दुष्काळग्रस्त शेतकऱ्यांना हेक्टरी ₹५० हजार तातडीची मदत द्या! – भारतीय किसान संघाची मुख्यमंत्र्यांकडे निवेदनाद्वारे मागणी!
रब्बीसाठी बियाणे-खते मोफत देण्याची आणि पीक विमा भरपाई त्वरित करण्याची धाराशिव जिल्ह्यात जोरदार मागणी.
तुळजापूर प्रतिनिधी:-
महाराष्ट्रातील विविध भागांत यंदा पावसाच्या असमान वितरणामुळे खरीप पिकांचे प्रचंड नुकसान झाले आहे. वाढलेला उत्पादन खर्च आणि झालेली मोठी हानी लक्षात घेता, दुष्काळग्रस्त शेतकऱ्यांना आपत्कालीन निधीतून हेक्टरी ₹५० हजार तातडीची मदत ‘डीबीटी’ (DBT) द्वारे थेट खात्यावर जमा करावी, अशी जोरदार मागणी भारतीय किसान संघ (महाराष्ट्र प्रांत) च्या वतीने करण्यात आली आहे.
या संदर्भात धाराशिव जिल्ह्यातील सर्व तालुका तहसील कार्यालयांवर शेतकऱ्यांनी एकत्र येत, आपापल्या तहसीलदारांमार्फत राज्याचे मुख्यमंत्री मा. देवेंद्रजी फडणवीस यांना निवेदन सादर केले.
निवेदनातील प्रमुख मागण्या-
हेक्टरी ₹५० हजारांची मदत: खरीप पिकांच्या नुकसानीपोटी आपत्कालीन निधीतून प्रतिहेक्टरी ₹५०,००० ची थेट आर्थिक मदत (DBT) त्वरित देण्यात यावी.
रब्बीसाठी मोफत खते व बियाणे- आगामी रब्बी हंगामाची पेरणी सावरण्यासाठी जिल्ह्यातील सर्व शेतकऱ्यांना बियाणे व खतांचा पुरवठा विनामूल्य करण्यात यावा.
पंचनामे व पीक विमा- शेतातील पीक नुकसानीचे पंचनामे तात्काळ पूर्ण करून पीक विम्याची नुकसानभरपाई विनाअट आणि तातडीने मंजूर करावी.कर्जमुक्ती व दिलासा- बँक कर्जाच्या बाबतीत शेतकऱ्यांना तात्काळ दिलासा देणारे धोरण राबवावे.
पशुधन व पिण्याचे पाणी- पशुधनासाठी चाऱ्याची व्यवस्था व पिण्याच्या पाण्याची टंचाई दूर करण्यासाठी ठोस उपाययोजना कराव्यात.
जलसंधारणाची कामे- दुष्काळी परिस्थितीवर दीर्घकालीन मात करण्यासाठी जलसंधारणाची कामे गतीने पूर्ण करावीत.
”शेतकऱ्यांना केवळ पोकळ सहानुभूती नको, तर पुढील रब्बी हंगाम उभा करण्यासाठी तातडीची व ठोस आर्थिक मदत आवश्यक आहे.”
— भारतीय किसान संघ
या निवेदनावर भारतीय किसान संघाचे प्रांत उपाध्यक्ष श्री. रावसाहेब शहाणे पाटील, जिल्हाध्यक्ष नितीन घुले (वाशी), लोहारा तालुकाध्यक्ष काशिनाथ लकडे, विवेकानंद बिराजदार, सिद्राम तांबडे (जेवळी), तुळजापूर तालुकाध्यक्ष अभिजित पांढरे (सिंदफळ), लक्ष्मण गोरे (परांडा), कळंब तालुकाध्यक्ष गणेश अडसूळ (ईटकूर), संग्राम नन्नवरे (वाशी), प्रभाकर डोंबाळे (भूम), रविंद्र बिराजदार (उमरगा) आणि गणेश उंबरे (धाराशिव) यांच्यासह जिल्ह्यातील प्रमुख शेतकरी व पदाधिकाऱ्यांच्या स्वाक्षऱ्या आहेत.
