भूममध्ये जनावरे चोरीचा पर्दाफाश: पिकअपसह ५.२५ लाखांचा मुद्देमाल जप्त; पवनचक्की वायर चोरीतील १४ गुन्ह्यांचा मुख्य आरोपी गजाआड!
स्थानिक गुन्हे शाखेची (LCB) दमदार कारवाई; एका विधीसंघर्षग्रस्त बालकालाही घेतले ताब्यात.
तुळजापूर प्रतिनिधी:-
भूम परिसरातून शेळ्या चोरी करणाऱ्या टोळीचा स्थानिक गुन्हे शाखेने (LCB) पर्दाफाश केला आहे. या कारवाईत चोरीत वापरलेली महिंद्रा पिकअप गाडी, दोन मोबाईल आणि रोख रक्कम असा एकूण ५ लाख २५ हजार रुपयांचा मुद्देमाल जप्त करण्यात आला आहे. विशेष म्हणजे, ताब्यात घेण्यात आलेला मुख्य आरोपी हा धाराशिव जिल्ह्यातील पवनचक्कीच्या तारा चोरीच्या तब्बल १४ गुन्ह्यांमध्ये पोलिसांना हवा असलेला सराईत गुन्हेगार असल्याचे निष्पन्न झाले आहे.
गोपनीय बातमीच्या आधारे भूम बसस्थानकावर छापा-
दिनांक २९ सप्टेंबर २०२६ रोजी स्थानिक गुन्हे शाखेचे सहाय्यक पोलीस निरीक्षक सुदर्शन कासार व त्यांचे पथक मालाविषयीचे गुन्हे उघडकीस आणण्याच्या अनुषंगाने गस्त घालत होते. या दरम्यान पोलीस ठाणे भूम येथील गु.र.नं. ४९८/२०२६, कलम ३०३ (२) BNS मधील संशयित आरोपी भूम बसस्थानक परिसरात आले असल्याची गोपनीय माहिती पोलिसांना मिळाली. या माहितीच्या आधारे पथकाने तातडीने छापा टाकून दोन संशयितांना ताब्यात घेतले.
शेळ्यांची चोरी करून बाजारात विक्री; ५.२५ लाखांचा मुद्देमाल जप्त.
ताब्यात घेतलेल्या संशयितांकडे सखोल चौकशी केली असता, त्यांनी २१ सप्टेंबर २०२६ च्या मध्यरात्री साबळेवाडी परिसरातून शेळ्या चोरी करून त्या मुरुम येथील जनावरांच्या बाजारात विकल्याची कबुली दिली. तसेच त्यांनी त्यांच्या इतर साथीदारांची नावेही पोलिसांना सांगितली. आरोपींकडून चोरीच्या शेळ्या विक्रीतून मिळालेली रोख रक्कम, गुन्ह्यात वापरलेली ०१ महिंद्रा पिकअप, ०२ मोबाईल व रोख रक्कम असा एकूण ५,२५,००० रुपयांचा मुद्देमाल पोलिसांनी पंचनामा करून जप्त केला आहे.
१४ गुन्ह्यांतील ‘पाहिजे असलेला’ आरोपी अटकेत
अटक करण्यात आलेल्या आरोपीचे नाव रमेश विश्वनाथ काळे (वय ३२ वर्ष, रा. पारधी पिढी, भूम, जि. धाराशिव) असे आहे. आरोपी रमेश काळे हा धाराशिव जिल्ह्यातील पवनचक्कीचे तारा चोरीच्या विविध १४ गुन्ह्यांत पोलिसांना हवा असलेला मुख्य आरोपी आहे. त्याच्या अटकेमुळे या सर्व गुन्ह्यांच्या तपासाला मोठा वेग मिळणार आहे. याशिवाय त्याच्यासोबत असलेल्या ०१ विधीसंघर्षग्रस्त बालकासही ताब्यात घेण्यात आले आहे. आरोपींची वैद्यकीय तपासणी करून त्यांना पुढील कारवाईसाठी भूम पोलीस ठाण्यात हजर करण्यात आले आहे.
वरिष्ठ अधिकाऱ्यांच्या मार्गदर्शनाखाली कारवाई
ही उल्लेखनीय कारवाई धाराशिवच्या पोलीस अधीक्षक श्रीमती रितु खोखर व अप्पर पोलीस अधीक्षक श्री. सचिन पांडकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक श्री. विनोद इज्जपवार, सपोनि सुदर्शन कासार, पोलीस अंमलदार शौकत पठाण, प्रकाश औताडे, जावेद काझी, फरहान पठाण आणि चालक पोलीस नागनाथ गुरव यांच्या पथकाने यशस्वीरीत्या पार पाडली.
