श्री तुळजाभवानी देवीची ‘मुरली अलंकार महापूजा’ संपन्न; शारदीय नवरात्र महोत्सवाच्या सहाव्या माळेनिमित्त भाविकांची गर्दी!
तुळजापूर प्रतिनिधी:-
महाराष्ट्राची कुलस्वामिनी आई श्री तुळजाभवानी देवीच्या शारदीय नवरात्र महोत्सवात आज, शुक्रवार (दि. १६) रोजी सहाव्या माळेनिमित्त देवीची अत्यंत आकर्षक ‘मुरली अलंकार महापूजा’ मोठ्या भक्तीभावात संपन्न झाली.
मुरली अलंकार महापूजेचे धार्मिक महत्त्व
धार्मिक आख्यायिकेनुसार, महिषासुराशी भीषण युद्ध सुरू असताना देवीने विविध रूपांचे दर्शन घडवले. या युद्धादरम्यान मुरलीधर रूपातील देवीने आपल्या मुरलीवादनाच्या माध्यमातून स्वर्गातील भयभीत देव-देवता आणि ऋषीमुनींना धीर दिला होता, तसेच त्यांच्या मनात आनंद व उत्साह निर्माण केला होता, अशी प्राचीन मान्यता आहे. या विशेष अलंकार पूजेतून देवीच्या याच दिव्य व मोहक स्वरूपाचे दर्शन हजारो भाविकांना लाभले.
राजहंस वाहनावरून छबिना मिरवणूक संपन्न
काल, गुरुवार (दि. १५) रोजी शारदीय नवरात्र महोत्सवाच्या निमित्ताने श्री तुळजाभवानी देवीची छबिना मिरवणूक राजहंस वाहनावरून थाटामाटात काढण्यात आली. या धार्मिक सोहळ्यास प्रशासकीय अधिकारी व मानकरी मोठ्या संख्येने उपस्थित होते, ज्यात प्रामुख्याने खालील व्यक्तींचा समावेश होता.
तहसीलदार तथा विश्वस्त- श्री. अरविंद बोळंगे
तहसीलदार तथा व्यवस्थापक (प्रशासन): सौ. माया माने
सहायक व्यवस्थापक (सामान्य): श्री. जयसिंग पाटील
सहायक व्यवस्थापक (प्रशासन): श्री. नागेश शितोळे
सहायक व्यवस्थापक (धार्मिक): श्री. अनुप ढमाले
मानकरी व धार्मिक प्रतिनिधी: महंत तुकोजीबुवा व महंत वाकोजीबुवा
तसेच अनेक पुजारी, सेवेकरी आणि राज्यभरातून आलेले भाविक मोठ्या संख्येनं उपस्थित होते.
