धाराशीव जिल्ह्यातील सिध्देश्वर वडगाव मध्ये बंद घर फोडून ३ लाखांचा ऐवज लंपास भरवस्तीत धाडसी चोरी !
तुळजापूर प्रतिनिधी ;- शहरात चोऱ्यांचे सत्र सुरूच असून, एका बंद घराचे कुलूप तोडून अज्ञात चोरट्यांनी सोन्या-चांदीच्या दागिन्यांसह ७० हजार रुपयांची रोकड, असा एकूण ३ लाख १ हजार रुपयांचा मुद्देमाल लंपास केला आहे. याप्रकरणी धाराशिव शहर पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, फिर्यादी प्रविण प्रल्हाद माने (वय ३७, रा. वडगाव सि. ता. जि. धाराशिव) यांचे राहते घर दि. २७ मार्च २०२६ रोजी बंद होते. सायंकाळी ६:०० वाजेच्या सुमारास अज्ञात चोरट्यांनी घराच्या दरवाजाचा कडी-कोंडा तोडून आत प्रवेश केला. चोरट्यांनी घरातील कपाटाचे कुलूप तोडून साहित्य अस्ताव्यस्त फेकले आणि मौल्यवान ऐवज चोरून नेला.
सोन्याचे दागिने: ५ ग्रॅम वजनाचे दागिने.
चांदीचे दागिने: १७५ तोळे चांदी.
पितळी भांडी: १२ किलो वजनाची भांडी.
रोख रक्कम: ७०,००० रुपये रोख.
एकूण किंमत: ३,०१,००० रुपये.
या चोरीप्रकरणी प्रविण माने यांनी दि. २८ मार्च २०२६ रोजी धाराशिव शहर पोलीस ठाण्यात फिर्याद दिली. त्यावरून पोलिसांनी अज्ञात आरोपींविरुद्ध भारतीय न्याय संहिता (BNS) कलम ३३१(३), ३३१(४) आणि ३०५ अन्वये गुन्हा नोंदवला आहे. या घटनेचा पुढील तपास पोलीस करत असून परिसरात भीतीचे वातावरण पसरले आहे.चोरट्यांचा तातडीने बंदोबस्त करण्याची मागणी प्रामुख्याने होत आहे.
नागरिकांनी बाहेर जाताना आपल्या घराची सुरक्षा अधिक कडक करावी आणि संशयास्पद हालचाली आढळल्यास त्वरित पोलिसांशी संपर्क साधावा, असे आवाहन करण्यात आले आहे.आणि नागरिकांनी सुद्धा सतर्क व सावध राहण्याची नितांत गरज आहे .
