“तुळजापूरच्या विकासाचा मास्टर प्लॅन “आमदार राणाजगजितसिंह पाटील यांची तुळजापूर येथे भव्य पत्रकार परिषद नगरसेवक अन् नगराध्यक्षांचीही उपस्थिती !
श्री तुळजाभवानी मंदिर विकास आराखड्याला वेग”
तुळजापूर प्रतिनिधी :-
आई राजा उदे उदे! श्री तुळजाभवानी मंदिराचा आणि संपूर्ण तुळजापूर शहराचा चेहरामोहरा बदलण्यासाठी प्रस्तावित असलेल्या विकास आराखड्याबाबत आज तुळजापूर येथील सर्किट हाऊसवर एक मोठी घडामोड पाहायला मिळाली. तालुक्याचे लोकप्रिय आमदार राणाजगजितसिंह पाटील यांनी या विकास आराखड्याच्या अंमलबजावणीसाठी आणि नियोजनासाठी सर्व नगरसेवक, नगराध्यक्ष आणि प्रमुख पदाधिकाऱ्यांसह एक भव्य पत्रकार परिषद घेतली.
ठळक मुद्दे:
विकास आराखड्यावर मंथन: मंदिर संस्थानच्या विकास आराखड्यात नेमक्या कोणत्या बाबींना प्राधान्य दिले जाणार आहे, याचे सादरीकरण यावेळी करण्यात आले.
लोकप्रतिनिधींचा सहभाग: केवळ शासकीय स्तरावर निर्णय न घेता, स्थानिक नगराध्यक्ष आणि सर्व नगरसेवकांना विश्वासात घेऊन शहराच्या भविष्यावर सविस्तर चर्चा करण्यात आली.
भाविकांच्या सोयीसुविधा: येणाऱ्या कोट्यवधी भाविकांना दर्शन सुलभ व्हावे आणि स्थानिक व्यापाऱ्यांचे हित जपले जावे, त्यांना व्यापारी संकुल हे बनवून रोजगार निर्मिती अधिकाधिक करण्याचा प्रयत्न केला जाईल या सर्व विषयावरती आमदारांनी विशेष भर दिला.
दिव्यांग व्यक्ती साठी मंदिर परिसरात लिफ्ट उभारण्याच्या कामालाही गती देण्यासाठी प्रयत्न करणार असल्याचे जाहीर केले आहे.
यावेळी पत्रकारांशी संवाद साधताना आमदार पाटील म्हणाले की, “तुळजापूरचा विकास हेच आमचे ध्येय असून, या आराखड्यामुळे मंदिराचा कायापालट होणार आहे. हा प्रकल्प पूर्ण करण्यासाठी सर्व लोकप्रतिनिधी आणि नागरिकांचे सहकार्य अपेक्षित आहे.”पत्रकारांच्या प्रश्नांना समाधानकारक व मार्गदर्शनपर उत्तरे दिली
सर्किट हाऊस येथे झालेल्या या परिषदेमुळे तुळजापूरच्या विकासकामांना आता नवी गती मिळणार असल्याचे स्पष्ट झाले आहे.
तसेच भाविकांच्या गाड्या अडवून त्यांना त्रास देऊ इच्छिणाऱ्या लाचखोरी आणि वसुली करणाऱ्या शासकीय कर्मचाऱ्यांच्या अधिकार्यांशी फोनवरून चर्चा केली. व त्यांचे कान टोचले, शेवटी जाता जाता त्यांनी सर्व नागरिकांना या विकास आराखड्यासाठी सहकार्य करण्याचे विशेष आवाहन केले आहे.
