भक्तीचा महिमा! पुण्याच्या भाविकाकडून श्री तुळजाभवानी देवीला अर्धा किलो चांदीचे अलंकार अर्पण !
तुळजापूर :-महाराष्ट्राची कुलस्वामिनी जगतजननी आई तुळजाभवानीच्या चरणी ‘आई राजा उधो-उधो’च्या जयघोषात आणि भक्तीमय वातावरणात आज श्री क्षेत्र तुळजापूर येथे एका भाविकाने आपल्या आराध्य दैवताला मौल्यवान दागिन्यांचा नजराणा पेश केला. भक्ती शक्ती आणि दातृत्वाचा त्रिवेणी संगम पाहावयास मिळाला . पुण्यातील पिंपळे गुरव येथील रहिवासी श्री. दिगंबर बसवंतराव बिरादार यांनी श्री तुळजाभवानी देवीच्या चरणी अर्धा किलो वजनाचे चांदीचे वाहिक (अलंकार) अर्पण केले आहे.
दिगंबर बिरादार हे आज आई साहेबांच्या दर्शनासाठी तुळजापुरात आले होते. दर्शनानंतर त्यांनी अत्यंत श्रद्धेने देवीसाठी आणलेले दागिने मंदिर प्रशासनाकडे सुपूर्द केले. यामध्ये प्रामुख्याने
चांदीचा आकर्षक मुकुट, पारंपारिक चांदीचे कानातील मासे इत्यादी साज भक्ती भावाने आणि अत्यंत श्रद्धेने अर्पण करण्यात आले.
भक्ताच्या या दातृत्वाची दखल घेत श्री तुळजाभवानी मंदिर संस्थानच्या वतीने दिगंबर बिरादार यांचा सन्मान करण्यात आला. यावेळी मंदिर परिसरातील मान्यवर आणि कर्मचारी उपस्थित होते.
”देवीवरील अढळ श्रद्धेपोटी हे अलंकार अर्पण करण्याची संधी मिळाली, हे माझे भाग्य समजतो,” अशी भावना यावेळी बिरादार यांनी व्यक्त केली.
याप्रसंगी विकास वाणी, महेश गंजे, सूरज घुले यांच्यासह मंदिर संस्थानचे कर्मचारी आणि इतर भाविक मोठ्या संख्येने उपस्थित होते.
