तुळजापूर नगर परिषदेची मोठी कारवाई: जंगम मठाचे बेकायदेशीर बांधकाम तात्काळ थांबवण्याचे आदेश; अन्यथा कायदेशीर कारवाईचा इशारा!
तुळजापूर प्रतिनिधी :- तुळजापूर नगर परिषद कार्यालयाच्या पाठीमागील गट क्रमांक ९७२ (सिटी सर्वे क्र. ९७२ पै) येथील ७३१ चौ.मी. जागेवर चाललेले जंगम मठाचे बांधकाम तात्काळ थांबवण्याची कडक नोटीस नगर परिषदेने जारी केली आहे. हे बांधकाम न थांबवल्यास महाराष्ट्र प्रादेशिक नियोजन व नगररचना अधिनियम १९६६ आणि नगरपरिषद अधिनियमानुसार कायदेशीर कारवाई करण्यात येईल, असा स्पष्ट इशारा नगर परिषदेच्या मुख्याधिकाऱ्यांनी दिला आहे.
या जागेबाबत श्री. जयकुमार नागनाथ पांढरे यांनी दि. ३०/०६/२०२६ रोजी नगर परिषदेकडे तक्रार अर्ज दाखल केला होता. सदर जागा ही भाजी मंडईसाठी आरक्षित असून, तिचे भूसंपादन पूर्ण होऊन मालकी हक्क नगर परिषदेकडे हस्तांतरित झालेला आहे. दिशाभूल करून मिळवण्यात आलेली बांधकाम परवानगी रद्द करावी, चाललेले काम थांबवून सदर जागा नगर परिषदेच्या ताब्यात घेण्यात यावी आणि सार्वजनिक हितासाठी तिचा वापर व्हावा, अशी मागणी या तक्रारीत करण्यात आली होती.
प्राप्त कागदपत्रांची पाहणी केली असता खालील बाबी उघडकीस आल्या आहेत:
भूसंपादन निवाडा: सदर ७३१ चौ.मी. क्षेत्राचे भूसंपादन दि. ३०/१०/१९७८ रोजीच नगर परिषदेच्या नावे झालेले असून त्याचा मावेजादेखील नगर परिषदेने अदा केला आहे.
रद्दीकरणाचा पुरावा नाही: जंगम मठाने दि. १४/०७/२०२६ रोजी आपले लेखी म्हणणे सादर केले; परंतु त्यासोबत या जागेचे भूसंपादन रद्द झाल्याचा कोणताही अधिकृत कागदपत्र किंवा पुरावा आढळून आलेला नाही.
कामाची पाहणी: दि. १०/०७/२०२६ च्या सर्वसाधारण सभेतील निर्णयानुसार आणि नगर परिषदेच्या पत्रानुसार काम बंद करण्याचे कळवूनही स्थळ पाहणीदरम्यान बांधकाम अद्याप चालूच असल्याचे निदर्शनास आले आहे.
तात्काळ बांधकाम थांबवण्याचे आदेश
नगर परिषदेच्या जागेवर अनधिकृतपणे सुरू असलेले हे बांधकाम त्वरित बंद करण्याचे निर्देश नोटीसद्वारे मठाच्या अध्यक्षांना देण्यात आले आहेत. आदेशाचे पालन न झाल्यास कडक कायदेशीर पावले उचलली जातील, असे प्रशासनाकडून स्पष्ट करण्यात आले आहे. 
