ढेकरी येथे उघड्या खड्ड्यात पडल्याने दोन वर्षांच्या बालिकेचा दुर्दैवी मृत्यू; तुळजापूर पोलिसांत सरपंच, सदस्यांसह ५ जणांवर गुन्हा दाखल!
तुळजापूर प्रतिनिधी;- तुळजापूर तालुक्यातील ढेकरी येथे एक अत्यंत हृदयद्रावक घटना घडली आहे. घराशेजारी खेळताना उघड्या राहिलेल्या एका खड्ड्यात पडल्यामुळे अवघ्या दोन वर्षांच्या बालिकेचा दुर्दैवी मृत्यू झाला. या प्रकरणी तुळजापूर पोलीस ठाण्यात गावातील सरपंच आणि सदस्यांसह पाच जणांविरुद्ध निष्काळजीपणाचा गुन्हा दाखल करण्यात आला आहे.
आरुषी अजय पवार (वय २ वर्षे, रा. ढेकरी, ता. तुळजापूर) असे मृत बालिकेचे नाव आहे.
पोलीस सूत्रांकडून मिळालेल्या माहितीनुसार, ३ ऑगस्ट २०२६ रोजी सकाळी १०:०० ते १०:१५ वाजण्याच्या सुमारास २ वर्षांची लहानगी आरुषी ही तिच्या घराशेजारी खेळत होती. त्याच दरम्यान, शेजारील शेतात कोणत्याही प्रकारचे कंपाऊंड वॉल किंवा संरक्षणात्मक कट्टा नसलेल्या उघड्या खड्ड्यात ती अचानक पडली. खड्ड्यात पडल्याने गंभीर दुखापत होऊन तिचा जागीच दुर्दैवी अंत झाला.
फिर्यादी दिव्या अजय पवार (वय २० वर्षे) यांनी दिलेल्या तक्रारीनुसार, घराशेजारील शेतातील हा धोकादायक खड्डा बुजवून घेण्यासाठी संबंधित आरोपींना वेळोवेळी सांगण्यात आले होते. परंतु, आरोपींनी याकडे पूर्णपणे दुर्लक्ष केले. कोणतीही सुरक्षिततेची काळजी न घेता हलगर्जीपणा आणि निष्काळजीपणा दाखवून खड्डा तसाच उघडा ठेवला. या हलगर्जीपणामुळेच निष्पाप चिमुकलीला आपला जीव गमवावा लागला असल्याचा आरोप तक्रारीत करण्यात आला आहे.
आरोपींवर गुन्हा दाखल-
भाऊ उर्फ भाऊसाहेब मनोहर लाटे (पाटील) (रा. ढेकरी)
लखन भाऊ लाटे (पाटील) (रा. ढेकरी)
तेजस चांगदेव माने (सरपंच, रा. ढेकरी)
गुणवंत बळीराम देशमुख (ग्रामपंचायत सदस्य, रा. ढेकरी)
बालाजी तुकाराम शेंडगे (ग्रामपंचायत सदस्य, रा. ढेकरी)
मयत बालिकेची आई दिव्या पवार यांच्या प्रथम खबरेवरून (FIR) तुळजापूर पोलीस ठाण्यात ३ ऑगस्ट २०२६ रोजी भारतीय न्याय संहिता (BNS) कलम १०६(१) (निष्काळजीपणामुळे मृत्यू घडवून आणणे) आणि ३(५) (सामूहिक उद्देशाने केलेले कृत्य) अन्वये गुन्हा नोंदवण्यात आला आहे. या घटनेमुळे ढेकरी परिसरात तीव्र संताप व हळहळ व्यक्त केली जात असून पोलीस पुढील तपास करत आहेत.
