धाराशिवमध्ये ‘कोरडा दुष्काळ’ जाहीर करा! स्वाभिमानी शेतकरी संघटनेचा तुळजापुरात आक्रमक ‘रास्ता रोको’.
तुळजापूर प्रतिनिधी:- चालू हंगामात पावसाने पाठ फिरवल्याने धाराशिव जिल्ह्यावर भीषण पाणीटंचाई आणि दुष्काळाचे सावट घोंघावत आहे. या पार्श्वभूमीवर, धाराशिव जिल्ह्यात तत्काळ ‘कोरडा दुष्काळ’ जाहीर करावा आणि शेतकऱ्यांना तातडीने आर्थिक मदत द्यावी, या प्रमुख मागण्यांसाठी ‘स्वाभिमानी शेतकरी संघटने’च्या वतीने १२ सप्टेंबर २०२६ रोजी तुळजापूर येथील जुन्या बस स्थानकासमोर आक्रमक रास्ता रोको आंदोलन करण्यात आले.
या आंदोलनानंतर संघटनेच्या पदाधिकाऱ्यांनी तुळजापूरचे तहसीलदार यांना एका निवेदनाद्वारे शेतकऱ्यांच्या अत्यंत गंभीर परिस्थितीची जाणीव करून दिली आहे.
शेतकऱ्यांची परिस्थिती अत्यंत बिकट
निवेदनात नमूद केल्यानुसार, पावसाअभावी संपूर्ण जिल्ह्यात खरिपाची पिके जळून खाक झाली आहेत, तर आगामी रब्बी हंगामही धोक्यात आला आहे. विहिरी, कूपनलिका आणि इतर जलस्रोत आटल्यामुळे शेतीसोबतच जनावरांच्या पिण्याच्या पाण्याचा आणि चाऱ्याचा प्रश्न अत्यंत गंभीर बनला आहे. प्रशासनाच्या उदासीन धोरणामुळे शेतकरी आर्थिक संकटात सापडला असून तो आत्महत्येच्या उंबरठ्यावर उभा असल्याचे संघटनेने म्हटले आहे.
स्वाभिमानी शेतकरी संघटनेच्या प्रमुख मागण्या:
शासनाने तातडीने उपाययोजना कराव्यात, यासाठी संघटनेने खालील ४ प्रमुख मागण्या प्रशासनासमोर ठेवल्या आहेत.
दुष्काळ जाहीर करा धाराशिव जिल्ह्याला संपूर्णत ‘कोरडा दुष्काळग्रस्त’ क्षेत्र घोषित करण्यात यावे.
नुकसान भरपाई द्या: पीक नुकसानीपोटी बाधित शेतकऱ्यांना त्वरित किमान ५०,००० रुपये प्रति एकरी सानुग्रह अनुदान किंवा पीक विमा मंजूर करण्यात यावा.
कर्जमाफी आणि सक्तीची वसुली थांबवा: सर्व राष्ट्रीयीकृत व सहकारी बँकांमधील शेतकऱ्यांची संपूर्ण कर्जे माफ करावीत आणि सक्तीची कर्जवसुली तत्काळ थांबवण्यात यावी.
वीज बिल माफी: शेतकऱ्यांच्या कृषी पंपांचे वीज बिल संपूर्णपणे माफ करण्यात यावे आणि थकीत बिलापोटी सुरू असलेली वीज जोडणी खंडित करण्याची कारवाई तत्काळ थांबवावी.
आंदोलनातील प्रमुख सहभाग
या रास्ता रोको आंदोलनाचे नेतृत्व स्वाभिमानी शेतकरी संघटनेचे मराठवाडा अध्यक्ष रवींद्र भिमाशंकर इंगळे यांनी केले. या आंदोलनात त्यांच्यासह संघटनेचे अनेक प्रमुख पदाधिकारी आणि शेतकरी मोठ्या संख्येने सहभागी झाले होते.
उपस्थित प्रमुख पदाधिकारी:
धनाजी येडे (जिल्हा उपाध्यक्ष)
सुदर्शन भोजने (तालुका अध्यक्ष)
राजाभाऊ हाके (ओबीसी सेल – जिल्हा अध्यक्ष)
शहाजी सोमवंशी (जिल्हा प्रमुख)
मखदूम मुल्ला (युवा अध्यक्ष)
तसेच, या आंदोलनात अभय साळुंके, अर्जुन पिठलेवाड, बळीराम जाधव, विजय सिरसाट, संजीव भोसले, संजय नाना शितोळे, चंद्रकांत साळुंके, नंदू कदम, अरुण भोजने, विलास माळी, प्रकाश माळी, रमेश गाडे, निलेश गाडे, किशोर गांगणे आणि नाना साळुंके या कार्यकर्त्यांनी आणि स्थानिक शेतकऱ्यांनी आपला सक्रिय सहभाग नोंदवला.
प्रशासनाने या मागण्यांची लवकर दखल न घेतल्यास आगामी काळात आंदोलन अधिक तीव्र करण्याचा इशारा स्वाभिमानी शेतकरी संघटनेकडून देण्यात आला आहे.
