तुळजापुरात नवरात्रोत्सवात बनावट दारूचा सुळसुळाट रोखण्याचे आव्हान; महामार्गांसह हॉटेल्स, बारची विशेष तपासणी करण्याची मागणी!
अन्न व औषध प्रशासन, राज्य उत्पादन शुल्क अन् पोलिसांची संयुक्त कारवाई; ‘गुप्त’ पथकांद्वारे रॅकेटचा पर्दाफाश करण्याची नागरिकांची आग्रही मागणी.
तुळजापूर प्रतिनिधी:-
महाराष्ट्राची कुलस्वामिनी श्री तुळजाभवानी मातेच्या शारदीय नवरात्र महोत्सवाची तयारी अंतिम टप्प्यात आली असतानाच, तुळजापूर आणि परिसरात बनावट व अवैध दारू विक्रीचे जाळे फोफावण्याची दाट शक्यता वर्तवली जात आहे.
नवरात्रोत्सवापासून ते अश्विनी पौर्णिमेपर्यंत महाराष्ट्रासह कर्नाटक, सोलापूर, लातूर, धाराशिव व इतर भागांतून लाखो भाविक तुळजापुरात दाखल होतात. याच प्रचंड गर्दीचा गैरफायदा घेऊन बनावट दारूचा काळा बाजार चालवण्याचा कट काही समाजकंटकांकडून रचला जात असल्याची गंभीर चर्चा आहे. या पार्श्वभूमीवर प्रशासनाने तातडीने विशेष संयुक्त तपासणी मोहीम उघडून अवैध दारू विक्रीचा सुळसुळाट समूळ नष्ट करावा, अशी आग्रही मागणी भाविक व नागरिकांमधून होत आहे.
महामार्गांवर कडक नाकाबंदी अन् तपासणीची गरज-
पायी, एसटी बस तसेच खासगी वाहनांनी तुळजापूरकडे येणाऱ्या प्रमुख महामार्गांवर आणि शहराच्या प्रवेशद्वारांवर अन्न व औषध प्रशासन (FDA), राज्य उत्पादन शुल्क विभाग (Excise) आणि पोलिस प्रशासनाने संयुक्तपणे कडक नाकाबंदी करावी. संशयास्पद वाहने, महामार्गावरील हॉटेल्स, ढाबे, परमिट रूम आणि दारूच्या दुकानांची कसून झाडाझडती घेणे अत्यंत आवश्यक आहे. बनावट किंवा निकृष्ट दर्जाची दारू मानवी आरोग्यासाठी अत्यंत घातक ठरू शकते; त्यामुळे भाविकांच्या जिवाशी खेळणाऱ्या अशा बेकायदेशीर धंद्यांवर वेळेतच चाप बसवणे गरजेचे आहे.
कोट्यवधींची उलाढाल अन् बाहेरील भागातून होणारी आवक-
गेल्या काही वर्षांपासून नवरात्रोत्सवाच्या काळात तुळजापूरच्या आजूबाजूच्या भागातून आणि लगतच्या सीमावर्ती क्षेत्रातून मोठ्या प्रमाणावर अवैध व बनावट दारू आणली जाते. या काळ्या बाजारातून कोट्यवधी रुपयांची उलाढाल होत असल्याचा संशय व्यक्त केला जात आहे. या तक्रारींची वस्तुनिष्ठ पडताळणी करून सत्य समोर आणण्यासाठी प्रशासनाने ‘गुप्त’ माहिती गोळा करणारी स्वतंत्र पथके तैनात करावीत. संभाव्य साठवणुकीची ठिकाणे आणि वितरकांची माहिती मिळवून उत्सव सुरू होण्यापूर्वीच कारवाईचा बडगा उगारावा.
आयुक्त तुकाराम मुंढे यांनी लक्ष देण्याची मागणी
भाविकांचे आरोग्य आणि सुरक्षा धोक्यात आणणाऱ्या या प्रकाराची गंभीर दखल अन्न व औषध प्रशासनाचे आयुक्त तुकाराम मुंढे यांनी स्वतः घ्यावी, अशी मागणी स्थानिकांकडून केली जात आहे. शिस्तबद्ध आणि कडक कारभारासाठी ओळखल्या जाणाऱ्या मुंढे यांनी या प्रकरणात थेट हस्तक्षेप करून संबंधित यंत्रणेला विशेष निर्देश द्यावेत, जेणेकरून कोणत्याही दबावाशिवाय ही कारवाई पार पडेल.
दोषींवर कठोर कारवाई करा; पवित्रता राखण्याचे आव्हान-
श्री तुळजाभवानी मातेच्या पवित्र नगरीत येणाऱ्या भाविकांची सुरक्षा ही प्रशासनाची प्राथमिक जबाबदारी आहे. अवैध दारूचा साठा किंवा बनावट विक्री आढळल्यास संबंधितांवर कायद्यानुसार कठोर कारवाई करण्यात यावी. गर्दीचा गैरफायदा घेणाऱ्या समाजकंटकांचा बंदोबस्त करून तुळजापूरचे पावित्र्य आणि भाविकांचे आरोग्य जपण्यासाठी प्रशासनाची यंत्रणा वेळेत सज्ज होणार का, याकडे आता भाविक भक्त व तुळजापूरचे नागरिक या सर्वांचे लक्ष लागले आहे.
