भवानी ज्योतीच्या जयघोषाने तुळजापूर दुमदुमले! नवरात्रोत्सवाच्या स्वागतासाठी तुळजाईनगरी सज्ज
तुळजापूर प्रतिनिधी:-
‘आई तुळजाभवानी मातेचा जयघोष’, ढोल-ताशांचा गजर, वाजतगाजत निघालेल्या भवानी ज्योती आणि भाविकांच्या अलोट गर्दीने तीर्थक्षेत्र तुळजापूर नगरी गजबजून गेली आहे. नवरात्र उत्सवाच्या पूर्वसंध्येला संपूर्ण तुळजापूर शहर देवीच्या भक्तीत तल्लीन झाले असून नवरात्रोत्सवाच्या स्वागतासाठी पूर्णपणे सज्ज झाले आहे.
भवानी ज्योतीसाठी मंडळांची लगबग
महाराष्ट्रातील सार्वजनिक नवरात्रोत्सव मंडळांसाठी श्री तुळजाभवानी मातेच्या मंदिरातून भवानी ज्योत प्रज्वलित करून आपल्या गावी नेण्याला विशेष धार्मिक महत्त्व आहे. शुक्रवारी राज्याच्या विविध भागांतून आलेल्या कार्यकर्त्यांनी वाजतगाजत मंदिरात भवानी ज्योत प्रज्वलित केली आणि घटस्थापनेसाठी श्रीफळ घेऊन आपापल्या गावाकडे रवाना झाले. गावोगावी या भवानी ज्योतीचे जंगी स्वागत केले जाणार असून, पुढील नऊ दिवस धार्मिक व सांस्कृतिक उपक्रमांची रेलचेल असणार आहे.
कर्नाटकातील भाविक अन् बंजारा समाजाचा उत्साह-
घटस्थापनेच्या परंपरेनुसार कर्नाटकातील विविध भागांतून भाविक श्री तुळजाभवानीच्या दर्शनासाठी व पूजा करून श्रीफळ नेण्यासाठी तुळजापुरात मोठ्या संख्येने दाखल झाले आहेत. तसेच बंजारा समाजातील देवीभक्तांनीही दर्शनासाठी मोठी हजेरी लावली. भवानी ज्योत घेणारे कार्यकर्ते, कर्नाटकातील भाविक आणि देवीभक्तांच्या गर्दीमुळे मंदिर परिसरात यात्रेपूर्वीच उत्साहाचे वातावरण निर्माण झाले आहे.
राजे शहाजी महाद्वार विद्युत रोषणाईने उजळले
नवरात्रोत्सवानिमित्त श्री तुळजाभवानी मंदिरातील राजे शहाजी महाद्वार आणि राजमाता जिजाऊ महाद्वार परिसरात आकर्षक विद्युत रोषणाई करण्यात आली आहे. शहरातील मुख्य रस्ते, बाजारपेठा आणि मंदिराकडे जाणाऱ्या मार्गांवर पूजासाहित्य, देवीच्या प्रतिमा व धार्मिक वस्तूंची दुकाने सजली आहेत.
भाविकांसाठी दर्शन व्यवस्थेत बदल
गर्दीचे नियोजन करण्यासाठी मंदिर प्रशासनाने दर्शन व्यवस्थेत विशेष बदल केले आहेत. दर्शन पूर्ण झाल्यानंतर भाविकांना बाहेर पडण्यासाठी गोमुख तीर्थ परिसरातून नवीन पायऱ्यांचा मार्ग तयार करण्यात आला आहे.
पोलिसांचा बंदोबस्त व प्रशासकीय तयारी
शनिवार, दि. १० ऑक्टोबरपासून शहरात कडक पोलीस बंदोबस्त तैनात करण्यात येत आहे. वाहतूक नियंत्रण, सुरक्षितता आणि गर्दीच्या व्यवस्थापनासाठी विविध शासकीय यंत्रणांची कामे अंतिम टप्प्यात आली आहेत.
दुष्काळाच्या सावटात भक्तीचा जागर
यंदा अत्यल्प पावसामुळे धाराशिव जिल्ह्यासह परिसरात दुष्काळसदृश परिस्थिती आहे. शेतकरी व नागरिक आर्थिक अडचणींचा सामना करत असल्याने यात्रेतील उलाढालीवर काय परिणाम होतो, याकडे स्थानिक व्यापारी, पुजारी व हॉटेल व्यावसायिकांचे लक्ष आहे. मात्र, दुष्काळाचे सावट असले तरी भाविकांची तुळजाभवानीवरील श्रद्धा आणि उत्साह अजिबात कमी झालेला नाही.
भक्ती, परंपरा आणि ढोल-ताशांच्या गजरात तुळजाईनगरीतील मुख्य नवरात्रोत्सवाचा श्रीगणेश झाला आहे.
