लग्नाचे आमिष दाखवून अल्पवयीन मुलीवर लैंगिक अत्याचार; आरोपीविरुद्ध पोक्सोसह बीएनएस अंतर्गत गुन्हा दाखल!
तुळजापूर प्रतिनिधी:-
लग्नाचे आमिष दाखवून एका १५ वर्षे ११ महिने वयाच्या अल्पवयीन मुलीवर वारंवार लैंगिक अत्याचार केल्याची धक्कादायक घटना समोर आली आहे. पीडित मुलगी गरोदर राहून तिने एका मुलीला जन्म दिल्यानंतर हा सर्व प्रकार उघडकीस आला. या प्रकरणी पीडितेच्या तक्रारीवरून धाराशिव शहर पोलीस ठाण्यात संबंधित तरुणाविरुद्ध पोक्सो कायदा आणि भारतीय न्याय संहितेच्या (BNS) विविध कलमांन्वये गुन्हा दाखल करण्यात आला आहे.
नेमकी काय आहे घटना?
मिळालेल्या माहितीनुसार, धाराशिव तालुक्यातील एका गावातील अल्पवयीन मुलगी सप्टेंबर २०२५ मध्ये भिमनगर, धाराशिव येथे आली असताना आणि त्यानंतर ऑक्टोबर २०२५ ते जानेवारी २०२६ या कालावधीत गावातीलच एका तरुणाने तिला लग्नाचे आमिष दाखवले. मुलगी अल्पवयीन असल्याचे माहीत असतानाही या तरुणाने तिच्यावर वेळोवेळी शारीरिक अत्याचार केले.
या अत्याचारातून पीडित अल्पवयीन मुलगी गरोदर राहिली आणि तिने एका मुलीस जन्म दिला. या घटनेनंतर पीडितेने धाव घेत धाराशिव शहर पोलीस ठाण्यात रविवारी (दि. ११ ऑक्टोबर २०२६) तक्रार दाखल केली.
गंभीर कलमांखाली गुन्हा दाखल-
पीडित मुलीने दिलेल्या प्रथम खबरेवरून (FIR) धाराशिव शहर पोलिसांनी आरोपी तरुणाविरुद्ध:
भारतीय न्याय संहिता (BNS): कलम ६४(१), ६४(२)(एम), ६५(१), ६९
बालकांचे लैंगिक अपराधांपासून संरक्षण (POCSO) कायदा २०१२: कलम ४, ८, १२
अन्वये गुन्हा दाखल केला आहे.
या प्रकरणाचा पुढील तपास धाराशिव शहर पोलीस करत असून आरोपीचा शोध आणि कायदेशीर कारवाई सुरू आहे. (पीडितेची ओळख गुप्त ठेवण्यासाठी तिचे नाव व गाव जाहीर करण्यात आलेले नाही.)
