हॉटेलमध्ये नातवाला खाऊ भरवणे पडले महागात; उमरग्यात महिलेची ८० हजारांची रोकड लंपास!
तुळजापूर (प्रतिनिधी):-
सावध राहा! गर्दीच्या ठिकाणी किंवा सार्वजनिक ठिकाणी थोड्याशा दुर्लक्षाचा फायदा घेऊन चोरटे डल्ला मारत असल्याच्या घटनांमध्ये वाढ होत आहे. उमरगा तालुक्यातील तुरोरी येथे असाच एक धक्कादायक प्रकार समोर आला असून, नातवाला खाऊ घालण्यात मग्न असलेल्या एका महिलेची ८० हजार रुपयांची रोकड असलेली पिशवी अज्ञात चोरट्याने पळवून नेली.
मिळालेल्या माहितीनुसार, फिर्यादी सविता अंबादास तिगलपल्ले (वय ४५ वर्षे, रा. तलमोड, ता. उमरगा) या गेल्या बुधवारी (दि. २५ मार्च) दुपारी २:१५ वाजेच्या सुमारास तुरोरी येथील मारुती मंदिराजवळ असलेल्या मधुकर सूर्यवंशी यांच्या हॉटेलमध्ये गेल्या होत्या. आपल्या लहान नातवाला खाऊ घालण्यासाठी त्या हॉटेलमध्ये बसल्या असता, त्यांनी आपली किराणा सामानाची पिशवी शेजारी ठेवली होती.
सविता यांचे लक्ष नातवाकडे असल्याचे पाहून अज्ञात चोरट्याने अत्यंत शिताफीने त्यांची किराणा सामानाची पिशवी उचलली. या पिशवीमध्ये ८०,००० रुपये रोख रक्कम होती. नातवाला खाऊ घालून झाल्यानंतर पिशवी गायब असल्याचे लक्षात येताच फिर्यादींना धक्का बसला. परिसरात शोधाशोध करूनही पिशवी आणि चोरट्याचा सुगावा लागला नाही.
या प्रकरणी सविता तिगलपल्ले यांनी रविवारी (दि. २९ मार्च) उमरगा पोलीस ठाण्यात धाव घेऊन तक्रार नोंदवली. त्यांच्या फिर्यादीवरून अज्ञात आरोपीविरुद्ध भारतीय न्याय संहिता (BNS) कलम ३०३(२) अन्वये गुन्हा दाखल करण्यात आला आहे. पोलीस आता हॉटेल परिसरातील सीसीटीव्ही फुटेज आणि इतर पुराव्यांच्या आधारे चोरट्याचा शोध घेत आहेत.
सार्वजनिक ठिकाणी वावरताना आपल्या मौल्यवान वस्तू आणि रोख रकमेबाबत नागरिकांनी सतर्क राहावे, असे आवाहन पोलीस प्रशासनाकडून करण्यात आले आहे. चोरट्यांचा वेळीच बंदोबस्त व्हावा व त्यांची रक्कम परत मिळावी अशी ग्रामस्थांमध्ये चर्चा आहे
