तुळजापुरात ‘वाचन दालना’द्वारे डॉ. बाबासाहेब आंबेडकरांना अनोखी आदरांजली; भाजपच्या वतीने विविध सामाजिक उपक्रमांचे आयोजन !
तुळजापूर प्रतिनिधी :
भारतीय राज्यघटनेचे शिल्पकार, विश्वरत्न डॉ. बाबासाहेब आंबेडकर यांच्या जयंतीनिमित्त तुळजापूर शहर भारतीय जनता पार्टीच्या वतीने अत्यंत स्तुत्य आणि वैविध्यपूर्ण उपक्रम राबवून अभिवादन करण्यात आले. केवळ उत्सव न साजरा करता ‘वाचन संस्कृती’ जोपासण्याच्या उद्देशाने शहरात खास ‘वाचन दालन’ उभारण्यात आले होते, ज्याचे सर्वत्र कौतुक होत आहे.
पुतळ्यास अभिवादन व वाचन दालनाचे उद्घाटन
कार्यक्रमाची सुरुवात डॉ. बाबासाहेब आंबेडकर यांच्या पुतळ्यास पुष्पहार अर्पण करून व अभिवादन करून करण्यात आली. जयंतीचे औचित्य साधून भाजप तुळजापूर शहराच्या वतीने एक विशेष वाचन दालन तयार करण्यात आले होते. या दालनात डॉ. बाबासाहेब आंबेडकरांनी लिहिलेले विपुल साहित्य आणि त्यांच्या जीवनावर आधारित विविध पुस्तके नागरिकांसाठी उपलब्ध करून देण्यात आली. उपस्थित मान्यवरांनी आणि नागरिकांनी या साहित्याचे वाचन करून महामानवास आगळीवेगळी आदरांजली वाहिली.
रक्तदान, अन्नदान आणि सांस्कृतिक कार्यक्रमांची रेलचेल पहावयास मिळाली.
केवळ वाचन दालनच नव्हे, तर सामाजिक बांधिलकी जपत शहरात विविध ठिकाणी रक्तदान शिबिर, अन्नदान आणि भीमगीतांच्या गायन कार्यक्रमांचे आयोजन करण्यात आले होते. या सर्व उपक्रम स्थळांना भाजपच्या पदाधिकाऱ्यांनी भेटी देऊन शुभेच्छा दिल्या आणि कार्यकर्त्यांचा उत्साह वाढवला.
मान्यवरांची उपस्थिती
या प्रसंगी तुळजापूरचे नगराध्यक्ष विनोद (पिटू भैय्या) गंगणे तसेच आनंद दादा कंदले यांच्यासह शहराचे सर्व नगरसेवक, भारतीय जनता पार्टीचे पदाधिकारी, कार्यकर्ते आणि मोठ्या संख्येने नागरिक उपस्थित होते.
”डॉ. बाबासाहेब आंबेडकरांचे विचार पुढच्या पिढीपर्यंत पोहोचवण्यासाठी ‘वाचन’ हाच सर्वोत्तम मार्ग आहे. त्यांच्या साहित्यातून मिळणारी प्रेरणा समाजाला दिशा देणारी ठरेल, याच भावनेतून आम्ही या वाचन दालनाची निर्मिती केली,” अशी भावना यावेळी व्यक्त करण्यात आली.
