भाविकाचे दातृत्व! साताऱ्याच्या देशमुख दांपत्याकडून श्री तुळजाभवानी देवीला १ लाख रुपयांची देणगी!
तुळजापूर प्रतिनिधी :- आई तुळजाभवानीची माया आणि तिच्या भाविकांचे दातृत्व याचा संगम आज तुळजापूर मंदिरात पाहावयास मिळाला. साताऱ्याचे प्रसिद्ध भाविक राजकुमार आनंदराव देशमुख यांनी आज आपली कुलस्वामिनी श्री तुळजाभवानी देवीच्या चरणी १ लाख रुपयांची रोकड देणगी म्हणून अर्पण केली आहे. त्यांच्या या दातृत्वाबद्दल मंदिर संस्थानच्या वतीने त्यांचा विशेष सन्मान करण्यात आला.
मिळालेल्या माहितीनुसार, सातारा जिल्ह्यातील खटाव येथील रहिवासी असलेले राजकुमार आनंदराव देशमुख हे आपल्या पत्नी गोदावरी देशमुख यांच्यासह श्री तुळजाभवानी देवीच्या दर्शनासाठी तुळजापूर येथे आले होते. देवीचे अत्यंत भावपूर्ण वातावरणात दर्शन घेतल्यानंतर, देशमुख दांपत्याने मंदिर संस्थानकडे १ लाख रुपयांचा धनादेश/निधी सुपूर्द केला.
देशमुख परिवाराच्या या पवित्र कार्याची दखल घेत श्री तुळजाभवानी मंदिर संस्थानच्या वतीने राजकुमार देशमुख व गोदावरी देशमुख यांचा श्री तुळजाभवानी देवीची विलोभनीय प्रतिमा आणि पवित्र महावस्त्र देऊन अत्यंत भक्ती भावात व आनंदी वातावरणात सपत्नीक योग्य तो सन्मान करण्यात आला. ”देवीच्या दर्शनाने मनाला मोठी शांतता मिळाली. जनसेवेसाठी आणि मंदिराच्या कार्यात खारीचा वाटा उचलता यावा, याच हेतूने ही छोटीशी सेवा देवीचरणी अर्पण केली आहे.”
या कौतुकास्पद प्रसंगी श्री तुळजाभवानी मंदिर संस्थानचे जनसंपर्क अधिकारी अभिजीत तेरखेडकर, तसेच रविराज गायकवाड यांच्यासह मंदिर संस्थानचे इतर प्रमुख कर्मचारी आणि सुरक्षारक्षक उपस्थित होते. देशमुख दांपत्याच्या या दातृत्वाची सध्या तुळजापुरात मोठी चर्चा असून त्यांच्यावर कौतुकाचा वर्षाव होत आहे.
