धाराशिव जिल्ह्यातील धक्कादायक प्रकार: लोहारा तालुक्यात अज्ञात माथेफिरूंकडून तब्बल १ कोटी ४९ लाखांच्या १६७३ सोन्यासारख्या सोलार प्लेट्सची तोडफोड!
तुळजापूर प्रतिनिधी :-लोहारा तालुक्यातील घटनेने जिल्हापर खळबळ उडाली आहे.
धाराशिव जिल्ह्यातील लोहारा पोलीस ठाण्याच्या हद्दीत एक अत्यंत धक्कादायक आणि मोठी नुकसानीची घटना समोर आली आहे. होळी शिवारातील एका नामांकित सोलार प्लांटमध्ये घुसून अज्ञात व्यक्तीने चालू स्थितीतील तब्बल १,६७३ सोलार प्लेट्स फोडून कंपनीचे १ कोटी ४९ लाख रुपयांचे अतोनात नुकसान केले आहे. याप्रकरणी लोहारा पोलीस ठाण्यात अज्ञात आरोपीविरुद्ध गुन्हा दाखल करण्यात आला असून पोलीस त्याचा कसून शोध घेत आहेत.
मिळालेल्या माहितीनुसार, होळी शिवारातील शेत गट नंबर ६४/१ मध्ये ‘पॉवर धाराशिव एमएच प्रा.लि.’ कंपनीचा सोलार प्लांट आहे. या प्लांटमध्ये ‘ईएमएमव्हीईई (EMMVEE) फोटो व्होल्टिक पॉवर प्रा.लि.’ कंपनीच्या सोलार प्लेट्स बसवण्यात आलेल्या आहेत.
दिनांक २० जून २०२६ रोजी रात्री ८:०० वाजेपासून ते २१ जून २०२६ रोजी सकाळी १०:०० वाजेच्या दरम्यान, कोणीतरी अज्ञात व्यक्तीने प्लांटमध्ये प्रवेश केला. कोणत्याही अज्ञात कारणासाठी या व्यक्तीने चालू स्थितीत असलेल्या एकूण १६७३ सोलार प्लेट्सची निर्घृणपणे तोडफोड केली आणि तिथून पळ काढला.
१ कोटी ४९ लाखांचे नुकसान, पोलिसांत गुन्हा दाखल
या मोठ्या तोडफोडीत कंपनीचे अंदाजे १,४९,००,००० रुपये (एक कोटी एकोणपन्नास लाख) इतके प्रचंड आर्थिक नुकसान झाले आहे. या घटनेनंतर परिसरात एकच खळबळ उडाली आहे.
याप्रकरणी ‘स्टर्लिंग अँड व्हिल्सन रिन्युएबल एनर्जी प्रा.लि.’ कंपनीचे ॲडमिनिस्ट्रेशन एक्झिक्युटिव्ह प्रविण हिंदुराव सोनवणे (वय ४७ वर्षे, मूळ रा. रणदुलाबाद, ता. कोरेगाव, जि. सातारा, सध्या रा. होळी, ता. लोहारा, जि. धाराशिव) यांनी लोहारा पोलीस ठाण्यात तक्रार दिली. त्यांच्या प्रथम खबरीवरून (FIR) दिनांक ०८ जुलै २०२६ रोजी अज्ञात आरोपीविरुद्ध भारतीय न्याय संहिता (BNS) कलम ३२४(५) अन्वये गुन्हा नोंदवण्यात आला आहे.
एवढ्या मोठ्या प्रमाणावर सोलार प्लेट्स फोडण्यामागे नेमका काय हेतू होता? हा प्रकार व्यावसायिक वैमनस्यातून झाला की स्थानिक वादातून? याचा तपास आता लोहारा पोलीस करत आहेत. एवढ्या मोठ्या प्लांटमध्ये सुरक्षा व्यवस्थेला चकवा देऊन ही तोडफोड कशी झाली, याबाबतही प्रश्नचिन्ह उपस्थित होत आहे.
या प्रकाराबद्दल काय माहिती मिळाल्यास त्वरित पोलिसांची संपर्क साधावा.
