धडाडणार राजाभाऊंची तोफ, धाराशिवमध्ये येणार भीमसैनिकांचा महापूर!
’अ ब क ड’ उपवर्गीकरण विरोधी महामोर्चाच्या नियोजनासाठी तुळजापुरात बैठक; कार्यकर्त्यांना कडक तंबी.
तुळजापूर प्रतिनिधी :- ‘अ ब क ड’ उपवर्गीकरण विरोधी कृती समितीच्या वतीने आज दिनांक १७ जुलै २०२६ रोजी तुळजापूर येथील शासकीय विश्रामगृहात (सर्किट हाऊस) एका महत्त्वपूर्ण बैठकीचे आयोजन करण्यात आले होते. येत्या २८ तारखेला धाराशिव येथे निघणाऱ्या ऐतिहासिक महामोर्चाच्या पूर्वतयारीचा आढावा या बैठकीत घेण्यात आला. या महामोर्चासाठी तुळजापूर शहर व तालुक्यातून जास्तीत जास्त संख्येने महिला भगिनी आणि पुरुषांनी उपस्थित राहावे, असे आवाहन यावेळी करण्यात आले.
पोस्टर आणि पॅम्पलेटचे वाटप
महामोर्चाचा प्रचार तळागाळातील लोकांपर्यंत पोहोचवण्यासाठी बैठकीदरम्यान अधिकृत पोस्टर्स आणि पॅम्पलेट्सचे अनावरण व वाटप करण्यात आले. येत्या २८ तारखेला धाराशिव येथे “राजाभाऊंची तोफ कडाडणार आणि भीमसैनिकांचा महापूर येणार” असा ठाम विश्वास उपस्थित पदाधिकाऱ्यांनी यावेळी व्यक्त केला. तसेच, आंदोलनाच्या एवढ्या महत्त्वाच्या टप्प्यावरही बैठकीस गैरहजर राहिलेल्या काही कार्यकर्त्यांची गंभीर दखल घेत, त्यांना नेत्यांकडून कडक तंबी देण्यात आली.
आंबेडकरी चळवळीतील दिग्गजांची उपस्थिती
या महत्त्वपूर्ण बैठकीच्या अध्यक्षस्थानी महाराष्ट्राचे जॉइंट सेक्रेटरी राजाभाऊ ओव्हाळ हे होते. याप्रसंगी आंबेडकरी चळवळीतील अनेक प्रमुख पदाधिकारी व कार्यकर्त्यांची उपस्थिती होती, ज्यामध्ये प्रामुख्याने:
विद्यानंद बनसोडे (जिल्हाध्यक्ष)
आनंद पांडागळे (मराठवाडा कार्याध्यक्ष)
रणजित (बप्पा) गायकवाड (जिल्हा नेते)
एस. के. गायकवाड (जिल्हा सरचिटणीस)
वैजनाथ पांडागळे (तुळजापूर शहर अध्यक्ष)
यांच्यासह बाबासाहेब बनसोडे, राजेंद्र शिंदे, बाबा कदम ,तुळजापूर तालुका उपाध्यक्ष किसन पांडागळे, ‘तुळजाई एक्सप्रेस न्यूज पोर्टल’चे मुख्य संपादक लहुजी घोडके, युवक आघाडीचे जिल्हा उपाध्यक्ष धम्मशिल कदम, चोखोबा सिरसट आदींसह मोठ्या संख्येने कार्यकर्ते व भीमसैनिक उपस्थित होते.
२८ तारखेचा हा महामोर्चा यशस्वी करण्यासाठी तुळजापूर तालुक्यातून रॅली व वाहनांद्वारे मोठ्या संख्येने जनसमुदाय धाराशिवकडे रवाना होणार असल्याचे नियोजन आहे.असा विश्वास यावेळी तुळजापूर शहराध्यक्ष वैजनाथ पांडागळे यांच्याकडून व्यक्त करण्यात आला.
