लोहारा येथे खळबळबळजनक घटना: वयोवृद्ध शिक्षकाचा मोबाईल हॅक करून तब्बल ५ लाखांचा डल्ला; सायबर पोलिसात गुन्हा दाखल!
तुळजापूर प्रतिनिधी :- लोहारा येथे खळबळ उडवून देणारी संताप जनक फसवणुकीची घटना.
डिजिटल युगात सायबर गुन्हेगारांचे धाडस दिवसेंदिवस वाढत चालले असून, आता एका सेवानिवृत्त/वयोवृद्ध नागरिकाला लक्ष्य केल्याची धक्कादायक घटना लोहारा येथे समोर आली आहे. लोहारा शहरातील पाटोदा रोडवरील शिक्षक कॉलनी येथे राहणाऱ्या एका ६१ वर्षीय नागरिकाचा मोबाईल हॅक करून अज्ञात भामट्याने तब्बल ४ लाख ९९ हजार २२० रुपयांची मोठी फसवणूक केली आहे.
या प्रकरणी वैजनाथ शिवलिंगअप्पा होळकुंदे (वय ६१ वर्षे, रा. शिक्षक कॉलनी, पाटोदा रोड, लोहारा) यांनी दिलेल्या फिर्यादीवरून सायबर पोलीस ठाण्यात अज्ञात आरोपीविरुद्ध गुन्हा दाखल करण्यात आला आहे.
मिळालेल्या माहितीनुसार, ही घटना दिनांक २३ जून २०२६ रोजी सायंकाळी १७:४५ वाजेपासून ते २४ जून २०२६ रोजी सकाळी ०९:०० वाजेपूर्वीच्या दरम्यान घडली. या वेळेत अज्ञात सायबर चोरट्याने फिर्यादी वैजनाथ होळकुंदे यांचा मोबाईल फोन सायबर तंत्रज्ञानाचा वापर करून बेकायदेशीरपणे ‘हॅक’ केला. मोबाईलचा ताबा मिळवल्यानंतर, चोरट्याने फिर्यादीच्या बँक खात्यातून तब्बल ४,९९,२२० रुपये अत्यंत हुशारीने लांबवले.
आपली फसवणूक झाल्याचे लक्षात येताच होळकुंदे यांनी तातडीने सायबर पोलिसांकडे धाव घेतली.
नवीन कायद्यान्वये (BNS) गुन्हा दाखल
या प्रकरणी फिर्यादी होळकुंदे यांनी दिनांक १७ जुलै २०२६ रोजी दिलेल्या प्रथम खबरेवरून (FIR) सायबर पोलीस ठाण्यात अज्ञात आरोपीविरुद्ध भारतीय न्याय संहिता (BNS) आणि माहिती तंत्रज्ञान कायद्यानुसार (IT Act) खालील कलमांअन्वये गुन्हा नोंदवला आहे:
भारतीय न्याय संहिता (BNS) कलमे: ३१८(४) [फसवणूक], ३२०, ३२१, ३३५, ३४०
माहिती तंत्रज्ञान कायदा (IT Act) कलमे: ६६ (सी) [ओळख चोरी], ६६ (डी) [संगणकीय संसाधनांचा वापर करून तोतयागिरीद्वारे फसवणूक]
या प्रकरणाचा पुढील तपास सायबर पोलीस अत्यंत गांभीर्याने करत असून, हॅकरचा शोध सुरू आहे.
सायबर पोलिसांचे आवाहन:
कोणत्याही अनोळखी लिंकवर क्लिक करू नका, मोबाईलवर आलेला OTP कोणासोबतही शेअर करू नका आणि बँक खात्याबाबत संशयास्पद हालचाल दिसल्यास त्वरित 1930 या राष्ट्रीय सायबर हेल्पलाईन क्रमांकावर संपर्क साधा.
