नागपंचमीचा उत्साह: तुळजापुरात पारंपरिक झोक्यांच्या खेळांवर महिलांचा थिरकणारा आनंद!
नगरसेविका सौ. प्रियंका(ताई) गंगणे यांच्या पुढाकाराने रंगला सांस्कृतिक सोहळा;
तुळजापूर प्रतिनिधी:-
महिलांचा उत्स्फूर्त प्रतिसाद नागपंचमीच्या पावन पर्वाचे औचित्य साधून तुळजापूर नगरपरिषदेच्या कर्तव्यदक्ष नगरसेविका सौ. प्रियंका विजय (सर) गंगणे यांच्या विशेष पुढाकारातून परिसरातील माता-भगिनींसाठी पारंपरिक झोक्याच्या खेळांचे उत्साहपूर्ण आयोजन करण्यात आले. या सोहळ्यामुळे लुप्त होत चाललेल्या ग्रामीण संस्कृतीची आणि परंपरांची नवी झलक पाहायला मिळाली.
या उपक्रमाला परिसरातील महिला, युवती आणि लहान मुलींनी मोठ्या संख्येने हजेरी लावत उत्स्फूर्त प्रतिसाद दिला. पारंपरिक झोक्यांवर उंचच उंच झोके घेत महिलांनी आनंदाने या सणाचा आस्वाद घेतला. याप्रसंगी उपस्थितांशी संवाद साधताना सौ. प्रियंका ताई गंगणे यांनी सर्वांना नागपंचमीच्या शुभेच्छा दिल्या. “महिलांच्या सक्रिय सहभागातूनच आपल्या सांस्कृतिक परंपरा आणि सामाजिक ऐक्य अधिक बळकट होते. संस्कृतीचे जतन करण्यासाठी अशा प्रकारचे उपक्रम सातत्याने राबवण्याचा आमचा मानस आहे,” असे प्रतिपादन त्यांनी केले.
या सोहळ्याला सपना पांढरे, अश्विनी दहीहंडे, सुनीता कावरे, प्रीती सोनवणे, उषा राठोड, सोनू वाळके, जयश्री कावरे, पल्लवी कदम आणि कविता शेंडगे यांच्यासह परिसरातील अनेक महिला मोठ्या संख्येने उपस्थित होत्या.
भगवान नागदेवतेच्या कृपेने सर्वांच्या जीवनात सुख, समृद्धी, आरोग्य आणि आनंद नांदो, अशा भावना यावेळी व्यक्त करण्यात आल्या. नगरसेविका सौ. प्रियंका गंगणे यांनी जपलेल्या सामाजिक बांधिलकीचे आणि महिलांसाठी राबवलेल्या या स्तुत्य उपक्रमाचे तुळजापूरकरांकडून विशेष कौतुक होत आहे.
