धाराशिव येथे महामोर्चाच्या नियोजनासाठी आलेले माजी आमदार सुधाकरराव भालेराव यांचा कृती समितीकडून भव्य सत्कार!
तुळजापूर प्रतिनिधी:-
आगामी २० तारखेला धाराशिव येथे आयोजित करण्यात आलेल्या भव्य महामोर्चाच्या पार्श्वभूमीवर, उदगीर मतदारसंघाचे माजी आमदार सुधाकरजी भालेराव हे धाराशिव दौऱ्यावर आले असता, ‘अनुसूचित जाती आरक्षण वर्गीकरण कृती समिती’च्या वतीने त्यांचा यथोचित व भव्य नागरी सत्कार करण्यात आला.
आरक्षणाच्या मुद्द्यावर समाजाची भक्कम संघटनात्मक बांधणी करणे आणि आगामी महामोर्चा भव्यदिव्य व यशस्वी करणे, या उद्देशाने धाराशिव येथे विशेष नियोजन बैठक पार पडली. या बैठकीसाठी माजी आमदार सुधाकरजी भालेराव यांनी प्रमुख उपस्थिती लावली होती. समाजात प्रदीर्घ काळ बजावलेली सामाजिक-राजकीय सेवा आणि आरक्षणाच्या प्रश्नावर सातत्याने घेतलेली सकारात्मक भूमिका लक्षात घेता, कृती समितीच्या पदाधिकाऱ्यांनी त्यांचे जल्लोषात स्वागत केले.
याप्रसंगी कृती समितीच्या वतीने भालेराव साहेबांचा शाल, पुष्पगुच्छ देऊन विशेष सत्कार करण्यात आला. सत्काराला उत्तर देताना माजी आमदार सुधाकरजी भालेराव यांनी २० तारखेच्या महामोर्चामध्ये समाजबांधवांनी जास्तीत जास्त संख्येने सहभागी होऊन आपले ऐक्य दाखवून द्यावे, असे आवाहन केले.
या कार्यक्रमास अनुसूचित जाती आरक्षण वर्गीकरण कृती समितीचे विविध प्रमुख पदाधिकारी, कार्यकर्ते आणि समाजबांधव मोठ्या संख्येने उपस्थित होते.
