अपत्यप्राप्तीचे आमिष दाखवून तब्बल ४७.८८ लाखांची फसवणूक; आनंदनगर पोलीस ठाण्यात ९ जणांवर गुन्हा दाखल!
तुळजापूर प्रतिनिधी :-
मुलं देण्याचे आमिष दाखवून एका ३८ वर्षीय व्यक्तीची तब्बल ४७ लाख ८८ हजार रुपयांची भयंकर फसवणूक केल्याची धक्कादायक घटना समोर आली आहे. याप्रकरणी आनंदनगर पोलीस ठाण्यात आठ ते नऊ जणांविरुद्ध गुन्हा दाखल करण्यात आला असून, पैसे परत मागितल्यावर लैंगिक अत्याचाराचा खोटा गुन्हा दाखल करण्याची धमकीही देण्यात आल्याचे उघडकीस आले आहे.
काय आहे नेमके प्रकरण?
धाराशिव येथील सांजा चौक परिसर (हनुमान मंदिराजवळ) राहणारे धनंजय दगडू मदने (वय ३८) यांना संशयित आरोपींनी सन २०२० पासून १७ ऑगस्ट २०२६ या कालावधीत विश्वासात घेतले. आरोपींनी संगनमत करून मदने यांची दिशाभूल करत त्यांना अपत्यप्राप्तीचे (मुलं देण्याचे) आमिष दाखवले. या आमिषाला बळी पडून मदने यांनी वेळोवेळी २५ लाख ८८ हजार रुपये रोख आणि २२ लाख रुपये ऑनलाईन स्वरूपात, असे एकूण ४७,८८,००० रुपये आरोपींना दिले.
कालावधी उलटूनही काहीच न झाल्याने फसवणूक झाल्याचे लक्षात आल्यावर मदने यांनी विचारणा केली असता, आरोपींनी त्यांना उलट लैंगिक अत्याचाराचा खोटा गुन्हा दाखल करण्याची थेट धमकी दिली.
या आरोपींवर झाला गुन्हा दाखल:
धनंजय मदने यांनी दिलेल्या प्रथम खबरेवरून (FIR) आनंदनगर पोलीस ठाण्यात खालील आरोपींवर भारतीय न्याय संहितेच्या (BNS) विविध कलमांतर्गत गुन्हा नोंदवण्यात आला आहे:
अश्विनी श्रीराम पाटील (रा. कार्ला, ता. तुळजापूर)
पार्वती उत्तम देवकते (रा. कार्ला, ता. तुळजापूर)
भुजंग उत्तम देवकते (रा. कार्ला, ता. तुळजापूर)
रेश्मा भुजंग देवकते (रा. कार्ला, ता. तुळजापूर)
श्रीदेवी दत्ता नन्नवरे (रा. येलमवाडी, ता. मोहोळ, जि. सोलापूर)
दत्ता नन्नवरे (रा. येलमवाडी, ता. मोहोळ, जि. सोलापूर)
जयश्री धुळुबा शिरगिरे (रा. तेर, ता. जि. धाराशिव)
दत्ता गंडदे (रा. पुणे)
कायदेशीर कारवाई:
दिनांक १७ ऑगस्ट २०२६ रोजी दाखल झालेल्या फिर्यादीवरून आनंदनगर पोलिसांनी भारतीय न्याय संहिता (BNS) कलम ३१८(४), ३५२, ३५१(२), ३५१(३) आणि ३(५) अन्वये गुन्हा नोंदवला असून, पोलीस या प्रकरणाचा पुढील तपास करत आहेत.
