४० वर्षांची सत्ता, एकही काम नाही! – खासदार ओमराजेंचा राणा–पद्मसिंह पाटीलांना करारा सवाल
श्रीमंत खासदारांच्या यादीत तिसरा नंबर, मग विकास जनतेचा की स्वतःचा? – ओमराजेंचा जळजळीत हल्ला
तुळजापूर | प्रतिनिधी
तुळजापूर नगरपरिषद निवडणुकीच्या पार्श्वभूमीवर महाविकास आघाडीचे नगराध्यक्ष पदाचे उमेदवार अमर मगर यांच्या समर्थनासाठी २७ नोव्हेंबर रोजी आयोजित प्रचारसभेत जिल्ह्याचे खासदार ओमराजे निंबाळकर यांनी भाजपावर जोरदार शब्दबाण सोडत सभेला तान दिला.
सभेसाठी तुळजापूरमध्ये दाखल झालेल्या खासदार निंबाळकर यांनी माजी गृहमंत्री डॉ. पद्मसिंह पाटील आणि भाजपाचे आमदार राणाजगजितसिंह पाटील यांच्या ४० वर्षांच्या सत्तेवर थेट प्रहार केला. “महाविकास आघाडीला अडीच वर्ष सत्ता मिळाली. त्यात दीड वर्ष कोरोना काळात गेलं. उरलेल्या वर्षात आम्ही धाराशिव जिल्ह्याला मेडिकल कॉलेज दिलं. पण तुमच्या चाळीस वर्षांच्या सत्तेत धाराशिव जिल्ह्यासाठी एक तरी ठोस काम केलं का?” असा सवाल खासदार निंबाळकर यांनी केला.
यापुढे बोलताना ते म्हणाले की, माजी गृहमंत्री पद्मसिंह पाटील हे देशातील ‘श्रीमंत खासदार’ यादीत तिसऱ्या क्रमांकावर होते. मग विकास जनतेसाठी केला की स्वतःसाठी? हे तुळजापूरकरांनी विचारायला हवं.
त्यांनी आरोप केला की, मेडिकल कॉलेज स्वतःच्या फायद्यासाठी मुंबईला नेण्यात आले आणि विद्यार्थ्यांकडून दोन-दोन अडीच लाख रुपये घेऊन ‘झोळी भरण्याचा’ उद्योग राबवला.
२०१४ साली पंतप्रधान नरेंद्र मोदी यांनी सोलापूर–तुळजापूर रेल्वेमार्गाची घोषणा केली होती. मात्र प्रत्यक्ष कामाला गती २०१९ नंतरच मिळाली, असे सांगत खासदार निंबाळकर म्हणाले, “मी खासदार झाल्यानंतरच रेल्वेमार्गाच्या कामाला सुरूवात झाली. त्यामुळे विकासात कोणाची भूमिका आहे, हे आमदार राणाजगजितसिंह पाटील यांनी विसरू नये.”
अमर मगर यांच्या प्रचारसभेत केलेल्या या आक्रमक भाषणामुळे राजकीय वातवरण आणखी चुरशीचे बनले असून आगामी मतदानापूर्वी महाविकास आघाडीने सत्ताधाऱ्यांना दिलेला हा प्रत्युत्तरात्मक टोला चर्चेत आहे.
कोरोनाच्या भीषण काळात तुळजापूर सिव्हिल हॉस्पिटलला दिलासा देण्यासाठी माननीय खासदार ओमराजे निंबाळकर यांनी १३.५० लाखांचा निधी उपलब्ध करून अत्यावश्यक ऑक्सिजन प्लांट उभारणीचे कार्य शांतपणे, कोणताही गाजावाजा न करता पार पाडले. कुठलीही जाहिरात, कुठलाही ढोलताशा नाही—गरज असताना दिलासा देणे हेच आपले कर्तव्य असल्याचा नम्र संदेश त्यांनी त्या कठीण काळात दिला.
कोरोना रुग्ण आढळलेल्या प्रत्येक भागात स्वतः जाऊन नागरिकांना धीर देणे, “घाबरू नका, सावध राहा” असा आत्मविश्वास देणे—ही त्यांची लोकाभिमुख कार्यशैली आजही नागरिक विसरलेली नाही.
याच काळात माननीय मुख्यमंत्री उद्धव ठाकरे यांच्या नेतृत्वाखाली जिल्ह्याचे शासकीय मेडिकल कॉलेज मंजूर, तुळजापुरातील छत्रपती शिवराय स्मारकासाठी ७५ लाखांचा निधी, तसेच कृष्णा खोरे अंतर्गत उजनीचे पाणी तुळजापूरला आणण्याची मंजुरी हीही ऐतिहासिक कामगिरी खासदार ओमराजे निंबाळकर आणि आमदार कैलास पाटील यांनीच करून घेतली.
या साऱ्या कामांमधून कधीच निधीवर डोळा न ठेवता “जनतेसाठी निधी, स्वतःसाठी नाही” ही भूमिका त्यांनी कायम ठेवली. उलट भाजपचे काही नवीन कार्यकर्ते या निधींवर डोळा ठेवून खोटे दावे करत असल्याची चर्चा शहरात रंगत आहे. पण तुळजापूरची जनता ‘दूध खुळी’ नाही, हे ते आगामी निवडणुकीत दाखवून देणार आहेत, असा सूर कार्यकर्त्यांत उमटतो आहे.
प्रश्नांची मालिका अनुत्तरितच…
माजी मुख्यमंत्री विलासराव देशमुख यांनी दिलेल्या ३२५ कोटींच्या प्राधिकरणाचा हिशोब अद्यापही धूसर.
तर ८६५ कोटींचा खर्च दाखवून मंदिराच्या पाठीमागे नवीन तुळजापूर वसवणे, रोपवे प्रकल्प, भक्त निवास–बंगले या योजनांमागे काय हेतू?
जुन्या तुळजापूरचे काय होणार?
या प्रश्नांची नागरिकांमध्ये जोरदार चर्चा सुरू आहे.
माजी मुख्यमंत्री मनोहर जोशी यांनी सैनिक स्कूल तुळजापूरला दिले, ३२ तलावांची निर्मिती, नवोदय विद्यालय—ही सर्व कामे काँग्रेसच्या काळात झालेली. उलट धाराशिव रेल्वे स्टेशन वडगावच्या हद्दीतून बाहेर हलवून आजही तुळजापूर–वडगाव एकत्रीकरण आणि तुळजापूर रेल्वेचा प्रश्‍न अधांतरी ठेवल्याची खंत नागरिक व्यक्त करत आहेत.
अफवांना बळी पडू नका; शहराच्या स्वच्छ भविष्याला मत द्या”
कुठल्याही अफवा, बोगस घोषणांवर विश्वास न ठेवण्याचे आवाहन करत कार्यकर्त्यांनी सांगितले
महाविकास आघाडीचे नगराध्यक्ष पदाचे उमेदवार अमर मगर आणि सर्व नगरसेवक उमेदवारांसमोरील बटण दाबून शहर स्वच्छ, सुरक्षित आणि प्रगतिशील बनवूया!”
तुळजापूरच्या राजकीय तापलेल्या वातावरणात ही चर्चा जोर धरत असून निवडणूक आणखी रंगत जाण्याची चिन्हे स्पष्ट दिसत आहेत.
