उमरगा शहरात घरफोडीचा थरार: बेडरूमच्या खिडकीचे गज कापून १०.५२ लाखांचा ऐवज लांबवला; २२ तोळे सोने आणि रोकड लंपास!
तुळजापूर प्रतिनिधी :-
उमरगा शहरातील कन्हैया मंगल कार्यालयाजवळील डिग्गी रोड परिसरात एक धक्कादायक घरफोडीची घटना उघडकीस आली आहे. घराच्या बेडरूमची खिडकी कापून आत शिरलेल्या अज्ञात चोरट्याने २२ तोळे सोन्याचे दागिने आणि रोख रकमेसह एकूण १० लाख ५२ हजार ७१० रुपयांचा ऐवज चोरून नेला आहे. या घटनेमुळे परिसरात मोठी खळबळ उडाली असून नागरिकांमध्ये भीतीचे वातावरण पसरले आहे.
मिळालेल्या माहितीनुसार, डिग्गी रोडवरील सर्व्हे नं. १८८, प्लॉट नं. २२ येथील रहिवासी रोहित बाळू जाधव (वय २८) हे आपल्या कुटुंबासह राहतात. दिनांक २४ ऑगस्ट २०२६ च्या रात्री ११:०० ते २५ ऑगस्ट २०२६ च्या सकाळी ०७:०० वाजेच्या सुमारास ही घटना घडली. अज्ञात चोरट्याने जाधव यांच्या घराच्या बेडरूमच्या खिडकीचे लोखंडी गज कापून आत प्रवेश केला. घरातील कपाटात ठेवलेले २२ तोळे सोन्याचे मौल्यवान दागिने आणि रोख रक्कम असा तब्बल १०,५२,७१० रुपयांचा माल चोरट्याने शिताफीने लांबवला.
जाधव यांच्या लक्षात ही चोरी आल्यानंतर त्यांनी तातडीने उमरगा पोलीस ठाणे गाठले. रोहित जाधव यांनी दिलेल्या प्रथम खबरेवरून (FIR) दिनांक २७ ऑगस्ट २०२६ रोजी उमरगा पोलीस ठाण्यात अज्ञात आरोपीविरोधात भारतीय न्याय संहिता (BNS) कलम ३३१(४) आणि ३०५(ए) अन्वये गुन्हा दाखल करण्यात आला आहे.
घटनेची माहिती मिळताच पोलिसांनी घटनास्थळी भेट देऊन पाहणी केली आहे. या घटनेचा पुढील अधिक तपास उमरगा पोलीस करत आहेत.
