तुळजाभवानी मंदिरात सुरक्षा रक्षकाचा प्रामाणिकपणा! मौल्यवान दागिने आणि रोकड असलेले पर्स कोल्हापूरच्या भाविकाला सुरक्षित सुपूर्द .
तुळजापूर प्रतिनिधी :-
श्री तुळजाभवानी मंदिर परिसरात सुरक्षारक्षकाने दाखवलेल्या प्रामाणिकपणामुळे एका भाविकाची हरवलेली पर्स सर्व मौल्यवान साहित्यासह सुरक्षित परत मिळाली आहे. सुरक्षा रक्षक माळी सोमनाथ यांच्या या कर्तव्यदक्षतेचे सर्व स्तरांतून कौतुक होत आहे.
मिळालेल्या माहितीनुसार, छत्रपती शिवाजी महाद्वार येथे दुपारच्या पाळीत कर्तव्यावर असताना सुरक्षा रक्षक माळी सोमनाथ यांना एक बेवारस लेडीज पर्स सापडली. त्यांनी क्षणाचाही विलंब न लावता प्रामाणिकपणा व सतर्कता दाखवत सदर पर्स तात्काळ मंदिर प्रशासनाच्या कंट्रोल रूममध्ये जमा केली.
कंट्रोल रूममध्ये पर्सची पाहणी केली असता, त्यामध्ये:
सोन्याचे दागिने: १ सोन्याचे गंठण
रोख रक्कम: ₹९,९८७
इतर वस्तू: १ अँड्रॉइड मोबाईल व महत्त्वाचे दस्तऐवज
असे मौल्यवान साहित्य आढळून आले.
यानंतर प्रशासनाने मोबाईल व इतर माहितीच्या आधारे संबंधित भाविकाचा शोध घेतला. पर्सच्या मालकी हक्काची खातरजमा केल्यानंतर, सर्व वस्तू कोल्हापूर येथील भाविकाच्या स्वाधीन करण्यात आल्या. हे भाविक शनिवारी सहकुटुंब श्री तुळजाभवानी देवीच्या दर्शनासाठी तुळजापूर येथे आले होते.
आपली मौल्यवान वस्तू आणि रोख रक्कम सुरक्षितपणे परत मिळाल्याने भाविकाने सुरक्षा रक्षक माळी सोमनाथ व मंदिर प्रशासनाचे मनःपूर्वक आभार मानले. माळी सोमनाथ यांच्या या प्रामाणिक व कर्तव्यदक्ष कामगिरीमुळे मंदिर परिसरात त्यांच्यावर कौतुकाचा वर्षाव होत आहे.
