शेतकऱ्यांची लूट? आरळी खुर्द येथे शासकीय पशुवैद्यकीय अधिकाऱ्याकडून ₹१,५०० उकळले; पावती देण्यास नकार, शिपायाकडूनही अनधिकृत प्रॅक्टिसचा गंभीर आरोप!
तुळजापूर प्रतिनिधी:-
तालुक्यातील आरळी खुर्द येथील शासकीय पशुवैद्यकीय दवाखान्यात उपचाराच्या नावाखाली शेतकऱ्यांची आर्थिक पिळवणूक केली जात असल्याचा खळबळजनक प्रकार उघडकीस आला आहे. एका गाईच्या उपचारासाठी ₹१,५०० शुल्क उकळून त्याची अधिकृत पावती नाकारण्यात आल्याचा आरोप अखिल भारतीय भ्रष्टाचार निर्मूलन संघर्ष समितीने केला आहे. याप्रकरणी संबंधित अधिकारी व अनधिकृत प्रॅक्टिस करणाऱ्या शिपायावर कठोर कारवाईच्या मागणीसाठी पंचायत समितीचे गटविकास अधिकारी (BD0) आणि तालुका पशुधन विकास अधिकाऱ्यांना लेखी निवेदन सादर करण्यात आले आहे.
प्रकरणाची पार्श्वभूमी व मुख्य आरोप
विनापावती ₹१,५०० ची वसुली: ४ सप्टेंबर २०२६ रोजी दुपारी आरळी खुर्द येथील शेतकरी धनाजी मनोहर पाटे यांनी त्यांच्या आजारी गाईवर उपचारासाठी पशुवैद्यकीय अधिकारी डॉ. बिराजदार यांना बोलावले होते. एका सलाईन आणि इंजेक्शनच्या उपचारापोटी अधिकाऱ्याने ₹१,५०० ची मागणी केली.
डिजिटल पुरावा उपलब्ध: संबंधित शेतकऱ्याने ही रक्कम फोन-पे (PhonePe) द्वारे ऑनलाइन वर्ग केली असून त्याचा स्क्रीनशॉट तक्रारदाराकडे उपलब्ध आहे. पैसे उकळूनही अधिकाऱ्याने कोणतीही अधिकृत पावती दिली नाही.
शिपायाकडून नियमबाह्य उपचार: दवाखान्यातील शिपाई स्वतः अनधिकृतपणे जनावरांवर पशुवैद्यकीय उपचार आणि प्रॅक्टिस करत असल्याचा अत्यंत गंभीर आरोपही निवेदनात करण्यात आला आहे.
’आम्ही कमीच पैसे घेतले’: शासकीय नियमानुसार ठरवून दिलेल्या दरांपेक्षा कितीतरी पट जास्त रक्कम उकळल्यानंतर, “आम्ही कमीच पैसे घेतले आहेत, इतर ठिकाणी यापेक्षा जास्त दर आकारला जातो,” असे बेजबाबदार उत्तर अधिकाऱ्याने दिल्याचे तक्रारीत नमूद आहे.
वरिष्ठ अधिकाऱ्यांकडे तक्रार आणि कारवाईची मागणी
अखिल भारतीय भ्रष्टाचार निर्मूलन संघर्ष समितीचे जिल्हाध्यक्ष गणेश प्रभाकर पाटील यांच्या नेतृत्वाखाली हे निवेदन देण्यात आले. या निवेदनाच्या प्रती जिल्हाधिकारी धाराशिव, मुख्य कार्यकारी अधिकारी (जि.प. धाराशिव) आणि जिल्हा अधीक्षक पशुधन कार्यालय यांनाही पाठवण्यात आल्या आहेत.
ग्रामीण भागातील शेतकरी आणि पशुपालकांच्या अडचणींचा गैरफायदा घेणाऱ्या या प्रकाराची निष्पक्ष चौकशी करून दोषींवर तात्काळ प्रशासकीय कारवाई करावी, तसेच शासकीय उपचारांच्या शुल्कात पारदर्शकता आणून प्रत्येक व्यवहाराची पावती सक्तीची करावी, अशी जोरदार मागणी आता परिसरातून होत आहे.
