तुळजापुरात ‘एसटी कॉलनी’त धाडसी घरफोडी! ३ लाख ३० हजारांचे दागिने व रोख रक्कम लंपास.
तुळजापूर प्रतिनिधी:-
तुळजापूर शहरातील एसटी कॉलनी परिसरामध्ये एका बंद घराचा कडी-कोंडा तोडून अज्ञात चोरट्याने ३ लाख ३० हजार रुपयांचा ऐवज लांबवल्याची खळबळजनक घटना समोर आली आहे. याप्रकरणी तुळजापूर पोलीस ठाण्यात अज्ञात आरोपीविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, एसटी कॉलनी, तुळजापूर येथील रहिवासी फिर्यादी अन्नपुर्णा सुभाषराव पांचाळ (वय ३८) या दि. १८ सप्टेंबर २०२६ रोजी दुपारी १२:०० वाजेच्या सुमारास कामानिमित्त घराबाहेर गेल्या होत्या. यानंतर दि. १८ सप्टेंबर रोजी दुपारी १२:०० ते दि. १९ सप्टेंबर रोजी रात्री ८:०० वाजेच्या दरम्यान, संधी साधून अज्ञात चोरट्याने त्यांच्या घराच्या मुख्य दरवाजाचा कडी-कोंडा तोडून आत प्रवेश केला.
चोरट्याने घरातील कपाटाची तोडफोड व उचकापाचक करून कपाटात ठेवलेले ५६ ग्रॅम वजनाचे सोन्याचे दागिने आणि ५०,००० रुपयांची रोख रक्कम, असा एकूण ३ लाख ३० हजार रुपयांचा माल चोरून नेला.
१९ सप्टेंबर रोजी रात्री घराचा कडी-कोंडा तुटल्याचे आणि घरातील साहित्य अस्ताव्यस्त असल्याचे लक्षात आल्यानंतर चोरीचा हा प्रकार उघडकीस आला. याप्रकरणी अन्नपुर्णा पांचाळ यांनी दि. २० सप्टेंबर २०२६ रोजी तुळजापूर पोलीस ठाण्यात फिर्याद दिली.
त्यांच्या प्रथम खबरेवरून तुळजापूर पोलिसांनी अज्ञात चोरट्याविरुद्ध भारतीय न्याय संहिता (BNS) कलम ३३१(५), ३३१(४) व ३०५(ए) अन्वये गुन्हा नोंदवला असून, पोलीस आरोपीचा शोध घेत आहेत.
