पीक कापणी प्रयोगातूनच समोर येईल नुकसानीचे वास्तव; धाराशिवमधील दुष्काळाची तीव्रता मुख्यमंत्र्यांसमोर मांडणार!
– आमदार राणाजगजितसिंह पाटील यांचे प्रतिपादन; कोंड येथे पीक कापणी प्रयोगाची प्रत्यक्ष पाहणी
तुळजापूर प्रतिनिधी:-
पीक कापणी प्रयोग हा केवळ कागदोपत्री आकडेवारी नोंदविण्याचा सोपस्कार नसून, शेतकऱ्यांच्या प्रत्यक्ष नुकसानीचे वस्तुनिष्ठ चित्र समोर आणणारी आणि त्यांना मिळणाऱ्या मदतीचा भक्कम आधार ठरणारी अतिशय महत्त्वाची प्रक्रिया आहे. त्यामुळे निर्धारित प्लॉटवर सुरू असलेल्या या प्रयोगादरम्यान शेतकऱ्यांनी स्वतः उपस्थित राहून सर्व प्रक्रिया पारदर्शक व अचूक पद्धतीने पार पडत असल्याची खात्री करावी, असे आवाहन आमदार राणाजगजितसिंह पाटील यांनी केले आहे.
धाराशिव तालुक्यातील कोंड येथे मंगळवारी सकाळी पार पडलेल्या पीक कापणी प्रयोगास आमदार पाटील यांनी प्रत्यक्ष भेट देऊन पाहणी केली. यावेळी त्यांनी शिवारातील पिकांची अवस्था आणि शेतकऱ्यांच्या नुकसानीचा सविस्तर आढावा घेतला.
”उभे पीक असले तरी हाती काही येण्याची शक्यता नाही”
शिवाराची पाहणी करताना आमदार पाटील म्हणाले की, पावसातील मोठा खंड, पिकांची खुंटलेली वाढ आणि त्यामुळे उत्पादनात होणारी प्रचंड घट यांमुळे शेतकरी गंभीर आर्थिक संकटात सापडला आहे.
”शेतात उभे पीक दिसत असले तरी अपेक्षित उत्पादन मिळेलच अशी परिस्थिती नाही. त्यामुळे केवळ कागदावरील आकडेवारीवर अवलंबून न राहता प्रत्यक्ष शेतातील वास्तव पीक कापणी प्रयोगातून अचूक नोंदवले गेले पाहिजे,” असे स्पष्ट मत त्यांनी मांडले.
मुख्यमंत्र्यांच्या पाहणी दौऱ्यात मांडणार वास्तव
बुधवारी राज्याचे मुख्यमंत्री देवेंद्र फडणवीस हे धाराशिव जिल्ह्याच्या दुष्काळी परिस्थितीचा आढावा घेण्यासाठी येत आहेत. या दौऱ्यादरम्यान पीक कापणी प्रयोगातून समोर आलेले वास्तव, पिकांचे झालेले नुकसान आणि दुष्काळाची भीषणता मुख्यमंत्र्यांसमोर ठामपणे मांडणार असल्याचे आमदार पाटील यांनी सांगितले.
तात्काळ नुकसान भरपाई अनुदान देण्याची गरज.
प्रभावी पीकविमा मदत वेळेत मंजूर करणे.
ग्रामीण भागात चारा व पाण्याची पुरेशी उपलब्धता करणे. स्थानिक पातळीवर रोजगाराच्या संधी उपलब्ध करून देणे.
या पीक कापणी प्रयोगावेळी कृषी सहाय्यक संगीता भागवत पतंगे, तालुका कृषी अधिकारी सलमा तांबोळी, सोनाली गाडेकर, तलाठी श्री. माळी, मंडळ कृषी अधिकारी मजीद शेख, कृषी पर्यवेक्षक श्री. लेणेकर, विमा प्रतिनिधी अमर भडंगे यांच्यासह परिसरातील नागरिक व शेतकरी मोठ्या संख्येने उपस्थित होते.
