तुळजापूर मंदिर संस्थानाविरोधात ‘जनहित संघटना’ आक्रमक; आजपासून साखळी उपोषण सुरू!
ॲड. अजय (भैय्या) साळुंके यांचा इशारा; २०१७ मधील लेखी आश्वासने पाळली नसल्याचा आरोप
तुळजापूर प्रतिनिधी :- श्री तुळजाभवानी मंदिर संस्थानाने २०१७ मध्ये दिलेल्या लेखी आश्वासनांची पूर्तता न केल्याने आणि वारंवार पाठपुरावा करूनही न्याय न मिळाल्याने, ‘जनहित संघटना महाराष्ट्र राज्य’ च्या वतीने आज, २१ जुलै २०२६ पासून जिल्हाधिकारी तथा अध्यक्ष, श्री तुळजाभवानी मंदिर संस्थान यांच्या कार्यालयासमोर साखळी उपोषण सुरू करण्यात आले आहे.
संस्थेचे संस्थापक ॲड. अजय (भैय्या) ज्ञानेश्वर साळुंके यांच्या नेतृत्त्वाखाली हे उपोषण छेडण्यात आले असून, दररोज सकाळी ११ ते ५ या वेळेत मागण्या पूर्ण होईपर्यंत हे आंदोलन सुरूच राहील, असा थेट इशारा प्रशासनाला देण्यात आला आहे.
प्रमुख मागण्या ज्यांसाठी पेटले आंदोलन:
रुग्णवाहिका तातडीने सुरू करा: मंदिर संस्थानाची रुग्णवाहिका सुरु करण्याचे लेखी आश्वासन देऊनही ती सुरु झालेली नाही. रुग्णवाहिका नसल्याने अनेक भक्तांना प्राण गमवावे लागले आहेत.
स्थानिकांसाठी विशेष दर्शन सुविधा: ‘गावकऱ्यांच्या गेट’मधून आधार कार्ड पाहून स्थानिक ग्रामस्थांना अभिषेकावेळी दही घालण्याच्या दर्शनाचा लाभ द्यावा.
समान दर्शन व्यवस्था: विधी व न्याय विभागाच्या सूचनेचे तंतोतंत पालन करून सर्व देवी भक्तांसाठी समान दर्शन व्यवस्था लागू करावी.
पुजाऱ्यांवरील हुकूमशाही थांबवा: पुजाऱ्यांवर हुकूमशाही पद्धतीने होणारी मंदिर बंदी थांबवून, त्यांचे म्हणणे मांडल्याशिवाय कोणतीही एकतर्फी कारवाई करू नये.
स्थानिक व पुजाऱ्यांना विश्वासात घ्या: प्राधिकरणादरम्यान गावकऱ्यांना आणि पुजाऱ्यांना विश्वासात घेतल्याशिवाय विकास कामे करू नयेत.
ब्रह्मदेव व उपदेवतांची पुनर्स्थापना: मंदिर विकास प्राधिकरणादरम्यान हलवण्यात आलेल्या ब्रह्मदेव आणि इतर उपदेवतांची पुनश्च विधीवत पुनर्स्थापना करावी.
’पेड दर्शन’ (पापदर्शन) त्वरित बंद करा: तुळजाभवानीच्या पावन भूमीत पिक्चर थिएटर व तमाशा थिएटरप्रमाणे सुरू असलेली ‘पेड दर्शन’ (पैसे देऊन दर्शन) व्यवस्था तात्काळ बंद करण्यात यावी.
पूर्वपार दर्शन व्यवस्था पूर्ववत करा: राजे शहाजी महाद्वारातून प्रवेश देऊन पूर्वपार चालत आलेली दर्शन व्यवस्था पुन्हा सुरू करावी, जेणेकरून ५० ते ६० टक्के भाविकांना त्रासाविना पूर्वपार दर्शन करता येईल. कृत्रिमरीत्या निर्माण होणारी गर्दी व रांगा यामुळे कमी होतील.
”प्रशासनाने दिलेल्या आश्वासनांची पूर्तता होईपर्यंत आमचे हे साखळी उपोषण दररोज सुरुच राहील!” > — ॲड. अजय (भैय्या) साळुंके (उपोषणकर्ते व संस्थापक, जनहित संघटना)
