धाराशिव पाणीपुरवठा योजनेचे खरे श्रेय अजित पवार यांनाच – राष्ट्रवादीचे जिल्हा प्रवक्ते ॲड. विशाल साखरे यांचा भाजपवर निशाणा !
धाराशिव : प्रतिनिधी
धाराशिव नगरपरिषदेसाठी उजनी जलवाहिनी प्रकल्पाची मुभा व मंजुरी ही राष्ट्रवादी काँग्रेस पक्षाचे ज्येष्ठ नेते तथा तत्कालीन उपमुख्यमंत्री अजित पवार यांच्या अथक प्रयत्नांमुळेच मिळालेली आहे. याबाबत भारतीय जनता पक्षाने श्रेय घेण्याचा प्रयत्न करणे ही दिशाभूल करणारी भूमिका असल्याचा आरोप राष्ट्रवादी काँग्रेस पार्टीचे जिल्हा प्रवक्ते ॲड. विशाल प्रभाकर साखरे यांनी केला आहे.
प्रसिद्धीपत्रकात त्यांनी नमूद केले की, २०११ ते २०१६ या कालावधीत ते धाराशिव नगरपरिषदेत पाणीपुरवठा सभापती म्हणून कार्यरत होते. त्या काळात उजनी पाणीपुरवठा योजनेसाठी सातत्याने पाठपुरावा करत असताना, प्रकल्पाला निर्णायक गती देऊन अंतिम मंजुरी अजित पवार यांनीच प्रदान केली होती. त्यामुळे योजनेचे राजकीय श्रेय कुठेही वळविण्याचा प्रयत्न हा ‘सभ्य राजकारणाला धरून नसलेला’ आहे, अशी टीका ॲड विशाल साखरे यांनी केली.
दि.२५ नोव्हेंबर रोजी भाजपचे आमदार पाटील यांनी घेतलेल्या पत्रकार परिषदेत पाणीपुरवठा योजनाबाबत श्रेय घेण्याचा प्रयत्न करण्यात आला. मात्र हा “संपूर्णपणे चुकीचा दावा” असून वस्तुस्थिती जनतेसमोर येणे गरजेचे असल्याचे साखरे यांनी स्पष्ट केले. “उजनीच्या पाण्यासाठी अनेक वर्षे पाठपुरावा करणारा पक्ष व नेतृत्व राष्ट्रवादी काँग्रेसचे असून, निर्णय प्रक्रियेतली महत्त्वाची भूमिका अजित पवार यांचीच राहिली आहे,” असेही त्यांनी सांगितले.
यासोबतच, धाराशिव नगरपरिषद निवडणुकीत राष्ट्रवादी काँग्रेस पार्टीकडून नगराध्यक्षा पदाच्या उमेदवार म्हणून घोषित ॲड. मंजुषा विशाल साखरे सक्षम, अभ्यासू आणि प्रशासनातील अडचणी हाताळण्यात पारंगत असल्याचेही जिल्हा प्रवक्ते ॲड. साखरे यांनी प्रसिद्धीपत्रकात म्हटले आहे.
धाराशिवच्या दीर्घकालीन पाणी समस्येवर स्थायी उपाय करण्यासाठी राष्ट्रवादी काँग्रेसने घेतलेली भूमिका ठाम असून जनतेला योग्य माहिती मिळावी यासाठी हे स्पष्टीकरण देणे आवश्यक असल्याचे ॲड. विशाल साखरे यांनी नमूद केले.
“उजनी पाणीपुरवठा धाराशिवला मिळवून देणारे खरे शिल्पकार म्हणजे तात्कालीन उपमुख्यमंत्री अजित पवार!”
— ॲड. विशाल साखरे, जिल्हा प्रवक्ते, राष्ट्रवादी काँग्रेस पार्टी, धाराशिव.
