तुळजापुरात खळबळजनक प्रकरण: खोट्या गुन्ह्यांच्या रॅकेटचा पर्दाफाश! माजी सैनिकाला अवघ्या १० दिवसांत जामीन मंजूर
धाराशिव विशेष न्यायालयाचा महत्त्वपूर्ण निर्णय; ॲड. एम. बी. माढेकर यांच्या प्रभावी युक्तिवादाला मोठे यश!
तुळजापूर प्रतिनिधी:-
बलात्कार आणि ॲट्रॉसिटीसारख्या गंभीर गुन्ह्यांमध्ये अडकलेल्या एका ६५ वर्षीय माजी सैनिकाला धाराशिव येथील फास्ट ट्रॅक विशेष न्यायालयाने अवघ्या १० दिवसांत नियमित जामीन मंजूर केला आहे. या प्रकरणातील बचाव पक्षाचे वकील ॲड. एम. बी. माढेकर यांनी मांडलेले खणखणीत तांत्रिक मुद्दे आणि फिर्यादीच्या कथित ‘खोट्या गुन्ह्यांच्या रॅकेटचा’ पर्दाफाश केल्यामुळे हा मोठा कायदेशीर दिलासा मिळाला आहे.
काय होता नेमका प्रकार?
बेंबळी पोलीस ठाण्यात (गुन्हा क्र. २९३/२०२६) भारतीय न्याय संहितेच्या (BNS) कलम ६४(१), ६९, ११५(२), ३५१(२), ३५१(३) तसेच ॲट्रॉसिटी कायद्याच्या विविध कलमांनुसार गुन्हा दाखल करण्यात आला होता. या प्रकरणात माजी सैनिकाला १४ ऑक्टोबर २०२६ रोजी अटक करण्यात आली होती. १७ ऑक्टोबर रोजी नियमित जामिनासाठी अर्ज दाखल करण्यात आला असून, दोन्ही बाजूंचा युक्तिवाद ऐकल्यानंतर विशेष न्यायालयाने २७ ऑक्टोबर २०२६ रोजी अवघ्या १० दिवसांत हा जामीन अर्ज मंजूर केला.
बचाव पक्षाचा प्रभावी युक्तिवाद आणि महत्त्वाचे मुद्दे-
अदालतीत बचाव पक्षाचे मुख्य वकील ॲड. एम. बी. माढेकर यांनी खालील महत्त्वाचे कायदेशीर व तांत्रिक मुद्दे प्रभावीपणे मांडले.
१. कथित खोट्या ॲट्रॉसिटी प्रकरणांचे सक्रिय रॅकेट:
फिर्यादी व तिच्या निकटवर्तीयांनी यापूर्वीही विविध पोलीस ठाण्यांमध्ये अशाच स्वरूपाचे अनेक गुन्हे दाखल केल्याची कागदपत्रे न्यायालयासमोर सादर करण्यात आली. ॲट्रॉसिटी कायद्याचा गैरवापर करून आर्थिक लाभ मिळविण्याच्या उद्देशाने सक्रिय असलेल्या रॅकेटचा पर्दाफाश करण्यात आला.
२. पूर्वीच्या FIR मधील कमालीचे साम्य:
सध्याचा FIR आणि पूर्वी दाखल झालेले गुन्हे यांमधील कथनातील साम्य आणि संशयास्पद बाबी न्यायालयाने गंभीरतेने नोंदवून घेतल्या.
३. वयोमान, प्रकृती व पार्श्वभूमी:
आरोपी हा ६५ वर्षांपेक्षा अधिक वयाचा माजी सैनिक असून त्यांची कोणतीही गुन्हेगारी पार्श्वभूमी नाही. त्यांच्या दोन्ही डोळ्यांवर शस्त्रक्रिया झालेली असून वयोमानामुळे त्यांना चालण्यासही त्रास होतो, ही बाब न्यायालयाच्या निदर्शनास आणून देण्यात आली.
४. तपासाची आवश्यकता नाही:
आरोपीला अटक होऊन तपासाचा महत्त्वपूर्ण भाग पूर्ण झाला असून, जप्त करण्यासाठी कोणतीही मालमत्ता बाकी नसल्याने पोलीस कोठडीची गरज उरली नसल्याचे स्पष्ट करण्यात आले.
न्यायालयाचा महत्त्वपूर्ण आदेश
दोन्ही बाजूंचे युक्तिवाद आणि कागदपत्रांची छाननी करून विशेष न्यायालयाने नियमित जामीन अर्ज क्रमांक ४४४/२०२६ मंजूर केला. या निकालामुळे माजी सैनिकाला मोठा दिलासा मिळाला असून, खोट्या गुन्ह्यांविरोधातील कायदेशीर लढ्यात बचाव पक्षाला मोठे यश आले आहे.
या यशस्वी कायदेशीर लढ्यात ॲड. एम. बी. माढेकर यांना ॲड. डी. ए. सरडे, संकेत भोसले आणि स्वप्निल बोबडे यांचे मोलाचे सहकार्य लाभले.
