स्वाधार योजनेच्या नावाखाली विद्यार्थ्यांची फरफट किती दिवस सहन करायची? वेबसाइट बंद असल्याने विद्यार्थी वंचित; धाराशिवमध्ये तीव्र आंदोलनाचा इशारा!
तुळजापूर प्रतिनिधी:-
डॉ. बाबासाहेब आंबेडकर स्वाधार योजनेचे ऑनलाइन अर्ज भरण्यासाठी शासनाकडून वेळोवेळी मुदतवाढ देऊनही ‘महाडीबीटी’ किंवा संबंधित ऑनलाइन वेबसाइट सुरळीत चालत नसल्याने अनुसूचित जातीच्या हजारो पात्र विद्यार्थ्यांचे शैक्षणिक नुकसान होण्याची भीती निर्माण झाली आहे. तांत्रिक अडचणींमुळे त्रस्त झालेल्या विद्यार्थ्यांनी प्रशासनाविरोधात संताप व्यक्त केला आहे. या गंभीर प्रश्नावर तातडीने तोडगा काढून समाजकल्याण विभागाने ऑफलाइन अर्ज स्वीकारण्यात यावेत, अन्यथा सहाय्यक आयुक्त, समाजकल्याण कार्यालय, धाराशिव यांच्याविरोधात तीव्र आंदोलन छेडण्यात येईल, असा इशारा विविध आंबेडकरवादी सामाजिक व राजकीय पक्ष-संघटनांनी दिला आहे.
ऑनलाइन मुदतवाढ ठरतेय निष्फळ!
शासनाने स्वाधार योजनेच्या अर्जांसाठी वेळोवेळी मुदतवाढ जाहीर केली आहे. मात्र, प्रत्यक्षात वेबसाइटच बंद राहत असल्याने किंवा सर्व्हर डाऊन असल्याने विद्यार्थ्यांना अर्ज भरता येत नाहीत.
१० वी उत्तीर्ण होऊन ११ वीत प्रवेश घेतलेले विद्यार्थी आणि १२ वी उत्तीर्ण होऊन महाविद्यालयाच्या प्रथम वर्षात (UG) प्रवेश घेतलेले विद्यार्थी या तांत्रिक घोळामुळे अर्ज करण्यापासून वंचित राहिले आहेत.
याशिवाय, शासकीय वसतिगृह प्रवेश प्रक्रियेतही अशाच अडचणी येत असल्याने विद्यार्थ्यांमध्ये मोठ्या प्रमाणावर असंतोष पसरला आहे.
”वेबसाइट बंद पडणे हा विद्यार्थ्यांचा दोष नाही. तांत्रिक त्रुटींची शिक्षा गरीब व आर्थिकदृष्ट्या दुर्बल घटकातील विद्यार्थ्यांना का? केवळ मुदतवाढ देऊन कागदी सोपस्कार पूर्ण करण्यापेक्षा प्रशासनाने अर्ज भरण्यासाठी पर्यायी offline व्यवस्था उपलब्ध करून द्यावी.”
— आंबेडकरवादी संघटनांची भूमिका
आंबेडकरवादी संघटनांच्या प्रमुख मागण्या –
१. ऑफलाइन अर्ज स्वीकारणे – तांत्रिक अडचणींमुळे ऑनलाइन अर्ज भरू न शकलेल्या सर्व पात्र विद्यार्थ्यांचे ऑफलाइन अर्ज तात्काळ स्वीकारले जावेत.
२. वेबसाइट सुरळीत करणे – स्वाधार योजनेची वेबसाइट पूर्ण क्षमतेने सुरू करून विद्यार्थ्यांना पुरेसा कालावधी दिला जावा.
३. वसतिगृह प्रवेशातील त्रुटी दूर करा – शासकीय वसतिगृह प्रवेश प्रक्रियेतील सर्व अडचणी तातडीने सोडवण्यात याव्यात.
४. पर्यायी व्यवस्था – तांत्रिक कारणांमुळे एकही पात्र विद्यार्थी स्वाधार योजनेच्या लाभापासून वंचित राहणार नाही, याची खबरदारी प्रशासनाने घ्यावी.
प्रशासनाला अल्टीमेटम – रस्त्यावर उतरण्याचा इशारा
स्वाधार योजना ही गरीब व गरजू विद्यार्थ्यांच्या शिक्षणाचा मुख्य आधार आहे. समाजकल्याण विभागाने या मागण्यांवर तातडीने सकारात्मक निर्णय घेतला नाही, तर धाराशिव येथील समाजकल्याण कार्यालयासमोर सर्व आंबेडकरवादी पक्ष-संघटनांच्या वतीने तीव्र निदर्शने व आंदोलन केले जाईल, असा सज्जड इशारा देण्यात आला आहे.
विद्यार्थ्यांसाठी महत्त्वाचे आवाहन –
स्वाधार योजनेचा अर्ज भरताना किंवा शासकीय वसतिगृह प्रवेश प्रक्रियेत अडचणी आलेल्या सर्व विद्यार्थ्यांनी आपल्या अर्जाच्या त्रुटी, स्क्रीनशॉट व आवश्यक कागदपत्रे/पुरावे जतन करून ठेवावेत आणि खालील संपर्क क्रमांकांवर संपर्क साधावा:
संपर्क क्रमांक :
९३७३४६९३७६
९८५०७९१९५२
०९८८१८२३४९२
०९०६७२६५३९४
०९८५०७००४००
