’आई राजा उदे उदे’च्या गजरात तुळजापूर दुमदुमले; सोलापूरच्या मानाच्या काठ्यांसह छबीना मिरवणुकीसाठी भाविकांचा जनसागर!
श्रीक्षेत्र तुळजापूर (प्रतिनिधी):-
कुलस्वामिनी श्री तुळजाभवानी देवीच्या चरणी नतमस्तक होण्यासाठी आणि पारंपारिक थाटात निघणाऱ्या सोलापूरच्या मानाच्या काठ्यांसह छबीना मिरवणुकीचे नयनरम्य सोहळे डोळ्यांत साठवण्यासाठी श्रीक्षेत्र तुळजापूर नगरीत भाविकांचा अथांग जनसागर लोटला आहे. देवीच्या दर्शनासह छबीना मिरवणुकीत सहभागी होण्यासाठी हजारो भाविक तुळजापुरात दाखल झाले असून, संपूर्ण मंदिर परिसर ‘आई राजा उदे उदे’च्या जयघोषाने आणि भक्तिमय वातावरणाने गजबजून गेला आहे.
सोलापूरच्या काठ्यांचे आगमन आणि छबीना सोहळा-
तुळजापूरच्या धार्मिक आणि सांस्कृतिक परंपरेत सोलापूरच्या मानाच्या काठ्यांसह निघणाऱ्या छबीना मिरवणुकीला अत्यंत विशेष महत्त्व आहे. या सोहळ्यात सहभागी होण्यासाठी सोलापूरसह राज्यभरातून हजारो भाविक आणि पालखी सोहळे तुळजापुरात दाखल झाले आहेत. रंगीबेरंगी वस्त्रे, पारंपरिक दागिने आणि फुलांनी सजवलेल्या या काठ्या पाहण्यासाठी व त्यांचे दर्शन घेण्यासाठी भाविकांची मोठी रांग लागली होती.
मंदिर परिसरात भक्तिमय वातावरण
छबीना मिरवणुकीदरम्यान ढोल-ताशांचा गजर, संबळाचा ताल आणि तुतारीच्या ललकारीने संपूर्ण मंदिर परिसर दुमदुमून गेला. भाविकांकडून होणारी भंडाऱ्याची उधळण आणि ‘श्री तुळजाभवानी माता की जय’च्या घोषणांमुळे वातावरणात एक वेगळाच उत्साह आणि चैतन्य पाहायला मिळाले.
भाविकांसाठी विशेष सोयी-सुविधा-
भाविकांची प्रचंड गर्दी लक्षात घेता मंदिर संस्थान, पोलीस प्रशासन आणि स्थानिक प्रशासनाच्या वतीने सुरक्षेचे चोख बंदोबस्त ठेवण्यात आले आहेत. दर्शनासाठी येणाऱ्या भाविकांना कोणताही त्रास होऊ नये म्हणून रांगेचे नियोजन, पिण्याच्या पाण्याची व्यवस्था आणि रुग्णवाहिकांची सेवा सज्ज ठेवण्यात आली आहे.
सोलापूरच्या काठ्यांचा हा पारंपरिक छबीना सोहळा अत्यंत उत्साहात आणि मंगलमय वातावरणात पार पडत असून, तुळजापूर नगरी संपूर्णपणे भक्तिरसात न्हाऊन निघाली आहे.
