तुळजापूर तालुक्यातील तुळजापूर खुर्द येथे पर्यावरण संवर्धनाचा नवा अध्याय: १२ तासांत ६६ हजार वृक्षलागवडीचा विक्रम!
‘हरित धाराशिव अभियान २.०’ अंतर्गत २.२० हेक्टरवर घनवन पद्धतीने ६२ प्रजातींच्या देशी वृक्षांचे रोपण; सामाजिक संघटना, प्रशासन आणि पत्रकारांचा उत्स्फूर्त सहभाग
तुळजापूर:
पर्यावरण संवर्धनाचा संदेश देत तुळजापूर तालुक्याने वृक्षलागवडीचा एक नवा आदर्श निर्माण केला आहे. तालुक्यातील मौजे तुळजापूर खुर्द येथील वनक्षेत्र गट क्रमांक ४४ येथे शुक्रवार, दि. १४ ऑगस्ट २०२६ रोजी ‘हरित धाराशिव अभियान २.०’ अंतर्गत एकाच दिवसात, अवघ्या १२ तासांत तब्बल ६६ हजार विविध प्रजातींच्या वृक्षांची घनवन (मियावाकी) पद्धतीने विक्रमी लागवड करण्यात आली.
या भव्य वृक्षलागवड मोहिमेचा अधिकृत शुभारंभ तहसीलदार बोळंगे, गटविकास अधिकारी हेमंत भिंगारदिवे आणि मुख्याधिकारी अजिंक्य रणदिवे यांच्या शुभहस्ते झाड लावून करण्यात आला.
२.२० हेक्टर क्षेत्रात ६२ प्रजातींचे देशी वृक्ष
वन विभागाच्या अंतर्गत येणाऱ्या २.२० हेक्टर जागेवर ६२ वेगवेगळ्या प्रकारच्या देशी प्रजातींच्या ६६ हजार रोपांची लागवड करण्यात आली आहे. घनवन पद्धतीचा वापर केल्यामुळे हे जंगल वेगाने वाढून परिसरातील जैवविविधता जपण्यास मोठी मदत होणार आहे.
सर्व स्तरांतून उत्स्फूर्त सहभाग
या उपक्रमात तुळजापूर तालुका पत्रकार संघाच्या वतीने जिल्हा उपाध्यक्ष श्रीकांत कदम, तालुका उपाध्यक्ष ज्ञानेश्वर गवळी, जिल्हा खजिनदार सुरज बागल, सचिन टेले, अहमद अन्सारी, सतीश फत्तेपुरे, अक्षय मोरे यांच्यासह विविध घटकांनी प्रत्यक्ष हिरिरीने सहभाग घेतला.
तसेच श्री तुळजाभवानी इंजिनिअरिंग कॉलेज, टाटा सामाजिक संस्था, विविध बँकांचे प्रतिनिधी, स्थानिक शाळा आणि अनेक सामाजिक संघटनांनी एकत्र येत या मोहिमेत मोलाचे योगदान दिले.
प्रशासकीय यंत्रणेचे विशेष परिश्रम
या उपक्रमाच्या यशस्वीतेसाठी वन परिक्षेत्र अधिकारी एन. एस. परचंडे, आर. एफ. ओ. शिवानंद कोळी, वनपाल गोविंद माळी, वनरक्षक विनोद पाटील यांच्यासह वन व महसूल विभागाच्या कर्मचाऱ्यांनी अहोरात्र परिश्रम घेतले.
या मोहिमेच्या माध्यमातून मोठ्या प्रमाणावर वृक्षलागवड करून पर्यावरण रक्षणाचा मोठा संदेश देण्यासोबतच वृक्षलागवडीचा एक नवा विक्रम प्रस्थापित करण्याचा प्रयत्न प्रशासनाकडून करण्यात आला आहे. प्रशासनाने परिसरातील नागरिकांना यापुढेही या वृक्षांचे संगोपन आणि संवर्धन करण्यासाठी सक्रिय सहभागी होण्याचे आवाहन केले आहे.
